قبل فوات الاوان 4

خرجت من غرفة السفرة لتقطع صعودهم الي غرفتهم بصوتها الهادر المتحدي
فريدة : انتي مش سبق ومشيتي مع عمك امبارح ايه اللي جابك تاني
وقبل ان ترد ندي استدار حازم ولم يكمل صعود السلم لينزل الدرجات التي صعدها ويتوجه واقفا امام امه بينما لاتزال ندي علي السلالم
حازم وقد علا وجهه بنفس نظرات التحدي التي بادرت بها امه : وجهلي انا الكلام ، ومتنسيش اني حلفت عليها متخرجش يعني مكنش ينفع تمشي
فريدة ببرود : بس ندي مشيت فعلا يا حازم وحلفانك بالطلاق وقع يعني انتي فعلا طالقتها تقدر تقولي ازاي طالعة معاك وانت مطلقها ولا الحاجات دي في علتك عادي زي ما كانت عمتك فاتحة بيتها لرفعت
ندي بعصبية : انا مسمحلكيش تتكلمي بالطريقة دي علي عمتي وانا متأكدة ان عمتي ست شريفة و————-
قاطعها حازم : استني يا ندي ، اسمعي يا ماما من غير كلام كتير مفيش منه رجي انا عايزك تسمعني كويس اولا ندي مخرجتش من البيت وقعدت عند دادا محاسن يعني يمين الطلاق موقعش اصلا
استقبلت فريدة كلمته بشئ من الضيق ونظرت بكل ما اوتيت من غل لندي
ليعاود حازم : ثانيا انا قريت الوصية اللي مكتوبة بخط ايد بابا وانا عارف خط بابا كويس وعارف انها سليمة ومش مزيفة واحب اقولك اني ناوي انفذها من غير قواضي او محاكم عشان دي اقل حاجة ممكن اعملها لبابا بعد موته ، انفذ وصيته
لتستقبل فريدة كلماته مرة اخري ولكن وقلبها مملوء بالحسرة والهم
وقبل ان يكمل قاطعته فريدة وقد شعرت بطعنة في قلبها مما قال : انت فاكر اني حاسيبك تبدد ثروة ابوك علي دول فاكرني حاسمحلك تسبلوهم مليم
حازم بتصميم : الشركة باسمي واقدر اتنازل عنها
فريدة بانزعاج : حتتنازل عن الشركة انت اكيد مجنون تعب ابوك حاضيعه ، انت اكيد اتهبلت في مخك يا حازم
حازم ولايزال علي تصميمه : اني احمي نفسي من المال الحرام ابقي اتهبلت
فريدة بعصبية : انك تتنازل عن شركة رأس مالها 6 مليون جينه ده ميعتبرش هبل
حازم ببرود : مدام مال حرام مش حيفرق كام
فريدة وقد بلغت زروة عصبيتها : انت عارف رأس مال شركة احلام ومصنعها كانوا كام دول من ايام التعريفة
حازم وقد امتلئ قلبه ببالغ الحزن : يعني فعلا المصنع والشركة كانوا بتوع احلام
وقعت نظرة حازم الحزينة لها في قلبها واشعارتها ولاول مرة ان كلماتها قد كسرته
انخفضت حدة صوتها وتحولت للين وكأنها بدأت الترجي تقدم خطوات وامسكت يده بينما كان حازم يتجه الي الصعود : حازم ، مضيعش تعب ابوك الفلوس دي فلوسنا وتعبنا احنا ، احنا ممكن نرجع لاحلام تمن المصنع وممكن نتمن بسعر انهارده اهو قرشين وانا واثقة انها حتسكت ساعتها قلت ايه
نفض حازم يدها عنه ونظر اليها وقد تمزق قلبه لرضاها بالمال الحرام
حازم بضيق : اه و ثالثا لاني مكنتش قولت ثالثا ، انا طالع انام لاني منمتش من امبارح واول ما اصحي حاخد ندي ولوجي وامشي من الفيلا
اتجه الي السلالم ليكمل الصعود مد يده لزوجته وهو يقول : يلا
التفتا الاثنين ليصعدا لتستوقفهم فريدة ببعض الحزن
فريدة : ناوي تروح فين يا حازم
وقف حازم ثم التفت اليها : اي مكان ما احسيش فيه ان ماله الحرام بيخنقني
ثم نظر لندي وهو ممسك بيدها : حتكملي معايا
ندي وهي تتشبث بيده : اكيد حاكمل