احببتك بعد الزواج

هذا اسم الرواية الصحيح بعد البحث عنه لكن لم أستطيع الوصول إلى اسم الكاتب ، له /لها  مني كل التقدير والاحترام.

الحلقة الأولى ~~

فى مدينه القاهره وفى احدى المنازل تبدأ حكايه اخرى .. اما ان تكون سعيده او حزينه.. شأت ام ابيت انه قدر .. ولكن مهما كانت الظروف هل تستطيع ان تتحملها؟ ..

تتسلل اشعه الشمس الى غرفه فتاه تتميز بالعيون الرماديه والرموش الكثيفه والشعر الغزير الناعم ووجه بياضه كبياض الثلج ..
تستيقظ الفتاه من تأثير النور على عينيها وصوت الطيور على شرفتها لتبدأ يوما جديد .. وتنظر فى الساعه لتجدها الثانيه عشر ظهرا … تزيل الغطاء من عليها وتخرج من غرفتها .. لتجد والدتها واختها ينظفون المنزل … ولكن ليس كعادتهم دائما …
أميره بأستغراب : صباح الخير .. بتعملوا ايه على الصبح كده ؟؟
حوريه الاخت الصغرى لأميره : بنضف البيت علشان ال…
لتسكتها الأم ….
الأم وهى مستمره فى التنظيف : صباح الخير يا أميره ..
اميره : صباح النور يا ماما .. هو فى حاجه ولا ايه .. ؟؟
الأم : ولا حاجه بنضف البيت شكله مش عاجبنى
اميره بضحك : بس بذمه اوى كده ليه .. ده الى يشوفك يقول بنتك جيلها عريس
حوريه بسرعه : ايه ده عرفتى ازاى ؟
اميره بأستغراب : عرفت ايه بالظبط ؟
نظرت الأم الى حوريه نظره غاضبه .. فنظرت حوريه الى الارض واكملت تنظيف …..

الأم بلهجه عاديه : انتى يا اميره جيلك عريس النهارده ..
اميره بسخريه : ايه ده فعلا !!! … طيب والله دى حاجه عظيمه اوى وكنتو هتقولولى امتى لما تكتبوا الكتاب …؟؟

الأم وهى تنظر لها نظره ذات معنى : انا مش عايزه الاسطوانه بتاعت تطفيش العرسان بتاعت كل مره دى … خلى يومك يعدى يا اميره احسنلك ..
اميره بعصبيه : هو بابا فين ؟ هو ساكت على الموضوع ده ازاى ؟
الأم : ده يبقى ابن صاحبه فى الشغل وبعدين اقعدى معاه وشوفيه مش يمكن يكون كويس .. مش هتخسرى حاجه ….
اميره : يا جمـــاعه مش كده بقى حرام عليكو .. انا مقبلش على نفسى انى اكون عرض يتفرج عليها فى قاعده عجبته يشتريها معجبتوش يشوف غيرها .. لو الموضوع ده منتهاش من قبل ما يبتدى صدقوونى هتندموا على الى انا هعمله معاه .. مااااشى يا ماما …
وقبل ان تتحدث الام …
خرج الاخ الاكبر لأميره وحوريه من غرفته على صوتهم العالى …
زياد : فى ايه هو الواحد ميعرفش ياخد راحته فى البيت يعنى .. انام فى الشارع علشان ترتاحوا …
لم يجيب عليه احد ليجد أميره فى كامل عصبيتها ووالدتها وحوريه يستكملان مهمه التنظيف …
زياد بأستغراب : فى ايه يا اميره مالك ؟؟
أميره بعصبيه : اسئل مامتك .. جايبنلى عريس لا وكمان عرفت بالصدفه وهما عارفين كويس انى مش هتجوز بالطريقه دى مش بحب الطريقه دى يا عالم والى يشوف كده يقول خلاص كبرت وعنست وبعدين مفيش حاجه اسمها عنست اصلا ده نصيب
زياد : اهدى بس .. ايه الموضوع يا ماما
الأم : بقولكوا ايـــه انا فيا الى مكفينى انتى يا أميره هتقابلى الراجل وتقعدى معاه علشان ابوكى مبسوط بيه اووى ولو عملتى حاجه كله هيطلع عليكى انتى فى الاخر وانت يا زياد تنزل تجيب الطلبات الى انا كاتبها فى المطبخ دى ….
لتنظر لهم أميره بعصبيه ثم تدخل غرفتها وتغلق الباب بعنف خلفها …. وهى تتمتم ببعض الكلمات …..
وفى الخارج الحال كما هو عليه .. نظر لهم زياد ثم دخل الى اميره
زياد : ممكن تسمعينى يا ميرو ومن غير عصبيه
أميره بعصبيه : انا مش هقابل البنى ادم ده لو ايه حصل
زياد بهدوء : اهدى بس وبطلى العصبيه بتعتك دى ..
أميره بغيظ : هديت اتفضل …
زياد : اقعدى معاه وطفشى بالذوق ايه رئيك
أميره بتفكير : ازاى دى ؟
زياد : هو انا الى هكلمك بردو على شغل البنات ده .. عقدى فى عشته وخلاص
أميره بتفكير : وافرض طلع بارد
زياد بضحك : مفتكرش بصراحه والا تبقى نحس يا اميره …
أميره : ماشى هعقده
زياد بضحك : ايه الشر ده … اما نشوف بقى .. انا هنزل اجيب الحاجات من تحت وخساره الفلوس بس مش مشكله هناكلهم احنا
أميره بضحك : امشى يا زياد خلينى افكر بقى …
زياد : ماشى يا ستى … هنشوف النهارده المعركه بين أميره عز الدين و العريس ترارارارا
أميره : طيب يا خويا الباب فى ايدك بقى ….
خرج زياد وظلت اميره تفكر وتفكر وتفكر …..