لست فقط حبيبي 2

قولى هتشرب ايه؟

رءوف : اى حاجة

باسم : بيرة مثلا والا حاجة تانية

رءوف : لا بيرة ايه طبعا لا استغفر الله العظيم اكيد حاجة تانية اى عصير

باسم : ههههههههههههههههههه

استغفر الله العظيم

مش شايف ان الجملة دى مش لايقة على المكان اللى انت قاعد فيه

رءوف : قصدك ايه ؟

باسم : انت اول مرة تدخل مكان زى ده … صح؟؟

رءوف : فعلا

باسم : طب ودخلته ليه لو البيرة فى نظرك استغفر الله العظيم يبقى المكان ده نفسه ايه ؟

رءوف : معاك حق انا ماشى

باسم : استنى بس انا مش قصدى انا كنت عاوز بس نتكلم مع بعض مش اقولك تمشى ….ماتبقاش حمقى كده يااخى…

رءوف : لا انت فعلا معاك حق انا مش عارف انا ازاى وافقت اجى هنا

باسم : طب استنى هاجى معاك وبالمرة اوصلك انت نسيت اننا جايين بعربيتى وعربيتك عند مهاب….

رءوف : طب ومهاب مين هيروحه

باسم : هههههههههههههههههههه لا ماتقلقشى عليه ده احتمال يبات هنا…..

يلا بينا…..

يخرج باسم مع رءوف فى سيارة باسم ويتوقف به عند كورنيش عروس البحر المتوسط …….

باسم : الله الجو الليلة دى تحفة وانا بحب اوى المكان ده فى الوقت ده بالذات

ايه رايك لو ننزل نقعد شوية؟

رءوف : معلشى ياباسم انا عاوز اروح حاسس انى تعبان شوية ومحتاج انام

باسم : لا دى حجة انت اكيد لسه قافش منى

رءوف : لاوالله ابدا انا مازعلتش منك اطلاقا

باسم : طب خلاص الهوا هنا هيفوقك اوى واتنين حمص الشام بقى ووتستمتع باحلى مزاج احلى من البيرة مليون مرة….

رءوف : ههههههههه اوك

ينزل باسم ورءوف من السيارة ويجلسوا امام البحر ……………..

ياخذ باسم نفس عميق

باسم : اممممممممممم ياسلام على هوا البحر بيتهيالى وانا بشمه انه بيغسلنى من جوه وبيخرج ومعاه كل همومى وبيخلينى صافى الذهن…..

رءوف : ياريت كل الهموم يقدر ياخدها معاه هوا البحر….

باسم : ده بقى بيتوقف على صاحب الهم نفسه..

يعنى لو هو عاوز همه يخرج هيخرج ولو فضل حابسه وقافل عليه ومستمتع بيه وبعذابه بيفضل جواه

رءوف : ومين يحب يفضل مهموم

باسم : اللى يفتكر ان همه مالوش حل….
اى هم لازم يكون ليه حل واوقات بيبقى بداية الحل حاجة هايفة زى

انه مثلا يعبر عنه او يتكلم فيه مع حد على البر…

اللى على البر بتبقى نظرته ادق واصح من اللى فى البحر بيقدر يشوف ابعد منه واحسن…