خطايا بريئة 2 | New Drama Episode
——————–
-مساء الخير يا دكتور
هتف بها “محمد” وهو يدلف لتوه لغرفة الكشف بذلك المستوصف الخيري القريب من منطقته ليرد الطبيب مُرحبًا:
-اهلًا يا “محمد” خير طمني عليك اخبار جرحك ايه؟؟
-ما انا جايلك علشان تبص عليه يظهر كده ان في غرزة اتفتحت
-وليه الاستهتار مش تاخد بالك، تعالا ابصلك عليه واشوف لو محتاج خياطة من جديد
-تمام
قام الطبيب بفحصه وبالفعل وجد أحد الغرز قد حُلت لذلك أعاد تقطيبها واستبدل ذلك الضماد الملطخ بالدماء بأخر معقم، ليشكر “محمد”الطبيب ويتحمحم بتردد قائلًا:
-هو ينفع اطلب منك خدمة يا دكتور
هز الطبيب رأسه برحابة ليسترسل “محمد” وهو يخرج من جيب بنطاله ذلك الشريط الفضي الذي فض منه تلك الحبوب اللعينة سبب نكبتها:
– عايز اعرف دي حبوب ايه ؟؟
ألتقط الطبيب الشريط من يده يقرأ ما سُجل على ظهره ثم نظر له نظرة متوجسة ذات مغزى جعلت “محمد” يبرر قائلًا:
-انا عارف النظرة دي معناها ايه؟ مش انا، ده واحد صاحبي بياخذه و عايز يبطله
تنهد الطبيب وهدر بعملية شديدة :
-النوع ده من الحبوب يندرج تحت بند الليسرجيك او(LsD) وتصنيفه جدول اول يا “محمد” لأنه من اقوى الحبوب المخدرة اللي تأثيرها سلبي على المخ
تهجمت ملامحه بعدما صدق حدثه وتسأل وهو يمسد جبهته بأنفعال:
-ممكن تفسرلي اكتر يا دكتور يعني بيعمل ايه؟
أومأ الطبيب برأسه واجابه:
-كل عقار بيختلف عن التاني في التأثير والضرر بس(LSD)
بيعمل اضطرابات في المزاج وبيفصل الإنسان عن الواقع وفي الأغلب بيفقده السيطرة على جسمه وعلى قدرته على التفكير وتقدير الأمور ده غير الهلوسات المرئية والسمعية، والقلق والتوتر ونوبات الذعر بس العوارض دي مش ثابتة يعني ممكن تختلف من شخص للتاني حسب نسبة التعاطي اللي للأسف لو زادت بيبقى الأمر خطير جدًا و مبنقدرش نتنبأ بتأثيره.
ابتلع “محمد” غصته ونظر للطبيب نظرة متوسلة وكانه يريده أن يفض كل ما في جعبته دفعة واحدة، ليسترسل الطبيب:
-معظم اللي بيلجأ للنوع ده بيبقى عايز يهرب من الواقع لأن الاعتماد النفسي فيه اكبر من الجسدي، أعرض صاحبك على دكتور نفسي يا “محمد” واكيد هيفيده ويقدر يساعده
هز “محمد” رأسه متفهمًا ثم تنهد بعمق وهو يتذكر حالتها التي كانت عليها، لينقبض قلبه بشدة ويصرخ بين ضلوعه أن لا يتخلى عنها ويرأف بها، فقد أيقن لتوه أن لا مفر منها وقد تورط بها بفعل نخوته وضميره اليقظ دائمًا
