قضية شرف 3
يوسف بهدوء : طب انتى زعلانه ليه دلوقتى
( امل تبصله وكأنها ما صدقت يسألها )
امل : انت ليه اضايقت لما ميار كانت قاعده مع سليم ؟
يوسف : عشان ميار زى رحمه بالظبط واكيد مش هقبل انها تقعد مع راجل غريب
امل : وليه مش بتضايق وانا قاعده معاك ؟
( يوسف يبصلها باستغراب ومش فاهم هى بتقول ايه اصلا )
يوسف : وانا هضايق ليه وانتى معايا ؟؟ .. ماانا اكيد لو بضايق وانتى معايا مكنش زمانى مكمل
امل : مش دا قصدى
يوسف : اومال ؟
امل : يعنى انت خوفت على ميار من سليم .. ليه مش بتخاف عليا منك ؟
يوسف : انتى هبله يابت ؟ .. ايه اللى بتقوليه دا !!
امل : لو سمحت كلمنى كويس لاما مش هتناقش معاك
يوسف : ما انتى تقولى كلام منطقى وبعدين اكلمك عدل
امل : كلامى منطقى جدا .. زى ما خوفت على ميار وسمعتها المفروض انك تخاف عليا وعلى سمعتى دا الا اذا انت مش بتشوفنى زيهم
يوسف : انتى فعلا من زيهم
( تضايق من كلامه ويوسف يلاحظ فيكمل )
يوسف : بصي .. انتى مش زي اخواتى ودا بالنسبالى انا مش فى العموم .. يعنى متقارنيش نفسك بيهم لسبب .. انا بشوفهم عيال صغيره مش فاهمه حاجه بشوفهم انهم ملزومين منى وانى لازم احميهم طول الوقت واوجههم .. بحس انهم مينفعش يبقوا مع اى راجل الا اللى يستاهلهم واللى يختاروه ويكون بعلم الناس كلها مينفعش اشوف اختى مع راجل واقول عادى ماانا بعمل كده .. انا لو عملت كده انتى اللى تقلقلى لانى لو قبلتها على اختى فاشطا هقبلها على مراتى .. انما انتى بشوفك ناضجه رغم انك من سنهم لكن انا بشوفك غير .. بخاف عليكى وبحميكى من الكل وفى نفس الوقت بحافظ عليكى .. انتى متتقارنيش بيهم بالنسبه للحب انما تتقارنى بالاخلاق والاخلاق دى قدام الناس مش انا اللى هحكم بيها لانى اكيد شايفكوا كويسين حتى لو بتغلطوا .. حاولى تفرقى بين اخاف عليكى منى وبين بحافظ عليكى .. لانى بحبك فاكيد مش هأذيكى لكن هحافظ عليكى .. فاهمانى !
امل : تمام فهمتك بس برضو انت زودتها وقتها وتقولها انا الراجل وحر .. ودا فى حد ذاته ضايقنى .. هو انت عشان الراجل تغلط براحتك انما الست لا ؟؟
يوسف باستنكار : اغلط براحتى !! .. دا اللى فهمتيه ؟؟ .. انى الراجل فمعناها انى متحكم .. يعنى امل معايا فانا هتجوزها ومحدد مشاعرى تجاها وعارف نفسي ومش بلعب .. انما هى مع سليم تعرف منين انه صادق ومبيلعبش بيها ! .. دا مش هيتثبت الا لو اتقدم .. غير كده يبقي بيلعب وانا مش هشم على ضهر ايدى واعرف هو نيته سليمه ولا لا .. انا اقدر اتحكم فى العلاقه هى متقدرش
