بين خوفه وهوسه
– تفتكرى سفرنا صح … انا من جوايه عايز ارجع بيت ابويا ونكمل حياتنا هناك بس الورشه هنا ناجحه وكبيره وليها اسمها
ظلت تنظر اليه ثم قالت بابتسامه
– لو فضلنا هنا انت مش هتبقا مرتاح …. صحيح هتستفيد من نجاح الورشه لكن مش هتكون سعيد ديما جواك هتكون فى حاجه ناقصه
ابتسم لها ابتسامه صغيره وقال
– يعنى انت معايا فى القرار ده ؟
هزت راسها بنعم وقالت
– جدا انا كمان محتاجه ارجع بيت بابا و احس بريحه امى
اخفض راسه وهو يدعوا لهم بالرحمه ثم قال
– يبقا على بركه الله
ابتسمت له وبدئوا فى احتساء كوبى الشاى بهدوء مع تبادل الحديث عن كل شئ و اى شئ بقلمى ساره مجدى
******************************
فى صباح اليوم التالى دلف أيهم الى مكتبه وهو ينفخ بضيق جلس خلف مكتبه ينظر الى إياد بغضب وقال
– انت مش مفهم الناس دى هي جايه تشتغل مع مين والمطلوب منهم ايه بالتحديد
رفع اياد راسه ينظر الى سقف الغرفه ثم تحرك ليجلس أمام أيهم وقال بملل
– خلصنا بقا ده على أساس ان حضرتك ممسحتش بكرامتهم الأرض وخلتهم نازلين من شركتك قفاهم يقمر عيش
ضحك أيهم بصوت عالى ثم قال
– بصراحه هما صعبوا عليًا بس انت عارفنى في الشغل معنديش يا إما ارحمينى ده كويس ان بابا مجاش النهارده
لوى إياد فمه بسخريه وهز راسه بمعنى لا فائده وقال
– عارف يا اخويا عارف …. المهم هتروح لرواد امتى
اعتدل أيهم في جلسته وقال باسترخاء
– خلال اليومين الجاين لانى عايزه في حاجه مهمه جدا واصلا هو كان قايلى على عربيه مميزه جياله صيانه خلال اليومين دول ….. وكمان علشان اعرف هو هيسافر امتى واعرف ارتب دنيتى
ليقف اياد ودار حول المكتب و هو يضر,ب كف بكف و قال
– الى يشوفك هنا في الشركة ميشفاكش وانت لابس العفريته ونايم تحت العربيات ومتشحم
ليقف أيهم على قدميه و تحرك في اتجاه ذلك الجدار الزجاجي الكبير ينظر الى العالم خارج شركته وقال بصوت هادئ
– عارف يا اياد كل السلطه والمكانه الى بحس بيها و انا داخل الشركة هنا او الى بحس بيها لما يقف قدامى موظف بيبص عليًا بخوف وهيبه كده كوم وانى اصلح عربيه واغير في تركيبتها واطورها وأحدثها كوم تانى صوت احلى مطربه في الكون ميجيش حاجه جمب صوت ماتور العربيه بعد ما كل الأعطال والمشاكل تتحل ياااااه كمانجه
