احببتك بعد الزواج
فى المساء كانت اميره امام المرايا تتأكد من مظهرها .. وزياد يتأكد من مظهره وحوريه كذلك … بينما فى غرفه الاب والام كان هذا هو الحوار …
الاب : انا مبسوط اوى بالنسب ده .. ده ابن اعز صاحب ليا .. من واحنا صغيرين .. ياااااه يا سهير نفسى اشوف اميره وهى معاه هبقى مطمن عليها حتى لو جرالى حاجه …
سهير : بعد الشر عليك يا عز متقولش كده … ربنا يستر بس وأميره متعملش زى كل مره وتطفشه …
عز : ده لو عملت كده هيبقى اخر يوم فى عمرها .. وسواء قبلت ولا رفضت انا اصلا هجوزهولها بالعافيه انا وصاحبى اتفقنا خلاص وكمان الولد عارفها وبيحبها وكان مكلمنى عليها من زمان وانا عارف مصلحه بنتى كويس
سهير : بس متنساش ان أميره لسه بتدرس والهندسه ده كان حلم عمرها من زمان ومش هتضحى بيه علشان جواز وهى رافضه الفكره دى تماما
عز : تبقى تكمل فى بيت جوزها او تكمل وهما مخطوبين المهم ان جاسر لأميره واميره لجاسر ومفيش نقاش فى الموضوع ده انا عارف مصلحتها اكتر منها ….
توقفوا على رن الجرس ….
سهير : دول وصلوا استقبلهم انت عقبال ما اشوف اميره …
عز : ماشى
فتح عز الباب ليأخذ صديقه نبيل فى احضانه ويضحكان سويا ..
جاسر : طيب نيجى فى وقت تانى بقى !!
احمد : ياعم دول نسيونا خالص يلا نمشى احسن
عز : تعالى يا واد هنا رايح فين .. اتفضلو يا جماعه اتفضلو
دخل الجميع الى الصالون ليتحدثان حتى دخل عليهم سهير وزياد وحوريه …
عز : دى مدام سهير وده زياد ابنى اخر سنه حقوق ودى حوريه ف تانيه ثانوى
نبيل : اهلا وسهلا تشرفت بيكو ….
سهير : واحنا والله . امال فين المدام مجتش معاكوا ليه ؟
نبيل بحزن : اصلها متوفيه
سهير : انا اسفه مكنتش اعرف
نبيل : لا ولا يهمك .
سهير : ازيك يا جاسر عامل ايه يا حبيبى
جاسر : الحمد لله يا طنط
زياد : وانت بتشتغل ايه يا جاسر ؟
جاسر : انا عندى شركه ديكور لو تسمع عن Professional company
زياد : اه طبعا دى اشهر من النار على العلم و من اهم شركات الديكور فى القاهره
عز : اصل جاسر من صغره وهو مش بيحب يضيع وقت ابدا وبسم الله ماشاء الله فتح شركه وبنها بنفسه
جاسر : شكرا يا عمى
نبيل : وانتى يا حوريه ساكته ليه ؟
حوريه بخجل : لا عادى هقول ايه !!
نبيل : احمد ابنى بردوا فى ثانويه بس هو تالته
حوريه : ربنا يوفقنا
احمد بتسبيل : اكيد هيوفقنا ..
ليضربه جاسر بيديه ….
نبيل : امال فين العروسه ؟
عز : شوفيها يا سهير اتأخرت ليه ..!!
لتدخل سهير لتجد اميره جالسه فى شرووود تام
سهير : يلا يا اميره الناس بتسئل عليكى
اميره : مستعجلين على ايه يعنى انا جايه وراكى اهو
