قبل فوات الاوان
—————————————————
لاتزال الصفعة مؤلمة لكن الالم الحقيقي في خوف في داخله ، اكثر شئ يخشاه هشام انه يقابل ولاول مرة فتاة محترمة بالفعل سيؤلمه جدا هذا الشعور سيؤلمه ان هناك فتاة طاهرة ونقية وعفيفة فكل الفتايات مثل نيرة او هكذا تربي هكذا كانت تبرر امه كل يوم تصرفات اخته نيرة تلبس مثل كل البنات ، نيرة تتصرف مثل كل البنات ، حتي انها تخطئ مثل كل البنات طيلة حياته كان عليه ان يقبل تصرفات اخته لانها ببساطة تصرفات مثل كل البنات عاش طيلة حياته يبحث عن اقذر البنات ويتعامل معاهم حتي يقنع نفسه انه بالفعل كل البنات هكذا حتي ولو كانت متدينة فتدينها ما هو الا غطاء لتصرفتها السيئة ولكن ماذا لو ان ندي ليست مثل نيرة ماذا لو قابل هشام الفتاة التي لا تلبس مثل اخته او تتصرف مثل اخته او تخطئ مثل اخته
نظر الي اسمها مرة اخري وهو يقول في نفسه : ندي هي نيرة ونيرة هي ندي برضاها او غصب عنها
—————————————–
لم يكن امام حازم سوي تلك المحاولة الاخيرة علي امل ان توافق ندي تجاه الي مكتبه وهاتفها مرة اخري وهو مقرر ان يحاول بكل ما اوتي ان يقنعها للعدول عن قرار ترك لوجي
حازم وقد قرر البدء بالسلام عليكم بدل الو
حازم : سلام عليكم
ندي : وعليكم السلام مين يا فندم
حازم : اكلم انسة ندي لو سمحتي
ندي و هي تزفر : ايوة يا استاذ حازم احب اسمع قرارك خير قررت ايه
حازم : قبل قراري ممكن فرصة ولو دقيقة واحدة بس اوضحلك حاجة
ندي بضيق : اتفضل
حازم : اسمعني يا انسة ندي كل كلمة قولتيها كان معاكي حق فيها بس ده مش سبب يخليكي تسيبي لوجي بالعكس ده سبب المفروض يخليكي تتمسكي بلوجي اكتر ليه تتخلي عن لوجي وانتي عارفة هي قد ايه بتحبك وقد ايه بتسمع كلامك ومن كتر حبها فيكي نفسها تبقي زيك ليه بعد ما علمتيها ازاي تحب القران عايزة تسيبيها
انتي عارفة هي قد ايه بتسمع كلامك عارفة ممكن تتأثر قد ايه لما تمشي
صمتت ندي فلم تجد ما تقوله ثم حاولت
ندي : انا مش مطالبة اني انا اللي اربي لوجي
حازم : عارف بس انتي متعاملتيش علي اساس تحفيظ القران وبس
ندي : ابقي كده غلطت ، غلطت اني كنت بتعامل مع لوجي علي انها بنتي او اختي الصغيرة
حازم : انتي اللي قولتي اهو بنتك او اختك تفتكري لو بتنك او اختك فعلا كنتي حتتخلي عنها ، اسمعي يا انسة ندي لو عايزة تغيري المواعيد او الايام انا تحت امرك لو عايزة مامتي تكون موجودة في وجودك حاقنعها لو عايزني مكنش موجود في البيت مش حاكون موجود لو عايزني موجود حتواجد علشان لو هشام او اي حد فكر يضايقك حتواجد ومش حتحسي بوجدي ها قولتي ايه
