قبل فوات الاوان

كنت حاسس ان حياتي معاها حتبقي فريش ومفيش مشاكل نخرج نسهر نرقص كنت بفرح بلبسها العريان وجسمها المكشوف كنت ببقي عايز اقول في اي المكان ان الست دي مراتي لحد —————-
لحد ما جيت لوجي وبقت هي دي المشكلة

لم يكن عصام بحاجة لان يسمع كلمات حازم فما كان يحكييه عن نيرة كان يعلمه ويعرفه بل ان هناك ما يعرفه عصام ولازال غائب عن حازم والافضل انه لايزال غائبا

عصام : لوجي بقت مشكلة

حازم : مش قصدي يا عصام انا عاوزك تفهمني انا منفسيش لوجي تبقي زي نيرة انا فعلا خايف علي لوجي خايف تتأثر بمامتها
ثم اردف : واللي مضايقني اكتر ان امي نفسها شايفة ان التصرفات دي عادية
ثم ابتسم وهو يقول لنفسه : انا نفسي شايف ان التصرفات دي عادية انا عمري ما قلت للنيرة متلبسيش ده او البسي ده اتصرفي كده او متتصرفيش كده عمري ما عقبت علي حاجة غلط
ثم زفر مرة اخري وهو يتابع : عارف يا عصام انا واخد بالي من يوم مارجعت من التغيير اللي لوجي فيه ومش حاكدب عليك انا مبسوط بلوجي اوي بفرح اوي لما اسمعها بتقول قران مع ندي مع اني بزعل لما بابص لنفسي ، ندي علمت لوجي حاجة عمر ما حد فينا كان حيعلمهالها علمتها تحب ربنا وتحب كلام ربنا وتخاف من ربنا انا ابوها عندي 30 سنة وعمري ما عرفت معني واحد من دول ولوجي اللي عندها 6 سنين فهمت ده احسن مني علشان كده انا مش عايز ندي تسيب لوجي بالعكس انا نفسي ان ندي هي اللي تربيها
عصام : طب ما تعرض عليها تبقي المربية بتاعتها
حازم : مع كل اسف مينفعش
عصام : ليه
حازم : علشان ندي دكتورة صيدلانية مينفعش تبقي مربية في بيت
عصام : عموما انا عندي فكرة والمرة دي بجد
حازم : ايه اتجوز دادا محاسن
عصام : لا مفيهاش جواز خالص ، انت اتصل بندي واشرحلها الكلام اللي انت قولتهولي وحاول كمان مرة

——————————————
نفيين : انتي ليه كلمتي بابا لوجي كده
ندي : كلمته ازاي يعني
نفيين : حاسة انك بتقفشي اوي من غير ما تدي فرصة للي قدامك
ندي و هي تزفر : اصلك مشوفتيهومش في عيد ميلاد لوجي واولهم حازم ده ، عارفة حازم ده افتتح الرقص في الحفلة مع نيرة و كأنه متجوزة امبارح لا واللطخ جوزها واقف عادي ولا فارق معاه وكلهم بلا استثناء هراز وضحك ورقص ومتعرفيش مرات مين مع مين هيصه
بجد خايفة افتح سكة الكلام مجرد كلام حتي لو يخص لوجي الاقي الموضوع قلب لكلمة في غنوة في حدوتة والنوعية دي ربنا ينجينا من شرهم ويبعدنا عنهم وبس
نفيين : يعني انتي خلاص نويتي تسيبي بيت رفعت الصاوي
ندي وهي تضحك : مش ملاحظة بجد ان الاسم ده عامل قلق
نفيين : رفعت الصاوي ، انا حاسة ان الموضوع لي علاقة بعمتو احلام بس مين رفعت الصاوي ده الله اعلم
ندي : انا سألت ماما وقالتلي مفيش حاجة مع اني كنت سامعة حوارهم مع بعض وانا رايحة عند التليفون
نفيين : مش عمتو كانت متجوزة قبل عمو طارق يمكن كان جوز عمتو
ندي : لا عمتو جوزها الاولاني كان اسمه توفيق ومات وبعد كده اتجوزت عمو طارق
نفيين وقد رسمت نظرة المفتش كرومبو : يمكن توفيق ده هو رفعت الصاوي
ندي وهي تضحك : يا بنتي بطلي القصص اللي بتقريها علي فتكات دي حتلحسلك مخك
نفيين : وانا لقيت حاجة اعملها بعد ما خلصت الكلية وقلت لا وبعدين بتحصل يا ندي
ندي : بتحصل ان توفيق يطلع رفعت
نفيين : ايوة عارفة وحازم يطلع اصلا ابن عمتك وفريدة هانم اخدتوا من عشرين سنة وعمتك كانت بتدور عليه طول السنين دي وبعدين لقيته وبعدين دموعهم تنهمر وتنمهر تنهمر جامد يعني وبعدين ——
قاطعتها نفيين من فيلمها العربي وهي تقذفها باحدي الوسائد
ندي : غوري يا بت من هنا