غنوة الحب لندى

.. كأنك لسه دماغك مسوحاكي يا بنت علي

بصتله باستغراب وانا مش فاهمة يقصد ايه فكمل كلامه

.. لساكي مش رايدة ولد عمك يا غنوة

بصتله باستغراب اكتر

.. يعني انت عارف

ياجدو

.. فكراني عيل صغير عاد طبعا عارف وعارف ان الجوازة مش علي هواكي بس مش

—

لاجل انك رافضة تتجوزي بالطريجة دي كيف ما بتجولي لابوكي انتي بس كل اللي مضايجك انك مسافرتيش وشايفة ان زين منعك من حلمك اللي مستنياه من سنين مش كده

بصتله وانا مش مصدقة انه عارف كل دا هو ازاي عرف اصلا انا مقلتش لحد عن احساسي ابدا ولا اتكلمت فيه ويمكن دي فعلا اكتر حاجة مضايقاني من الجوازة دي

.. يا جدو انا مكنتش مسافرة عشان العب انا كنت مسافرة اكمل ابحاثي ودراستي انا كنت هساعد ناس كتير اوي انا كنت شغاله علي دوا مهم وبجد برا كانت فرصتي انه يطلع للنور بس كل احلامي اتهدت في لحظة ومن غير ارادتي كمان

.. وهو الادويه مهتتصنعش غير برا اياك مستخسره خيرك في بلدك يا بنتي

.. ياجدو مش القصد مهما كمان هيستفادو بس برا فرصتي احسن برا بيقدرو الحاجات دي كويس اوي انا لو قعدت هنا عمري كله ممكن محدش يسمع عني اصلا

.. ودي مشكلتك يابنت علي

بصتله وانا مش فاهمه فكمل

.. المظاهر بتجري ورا المظاهر حديتك عن ان حد يسمع عنك وتتشهري مش عن هتبقي سبب فعلاج كام واحد حتي لو مش خابر مين كان السبب في علاجه

بصيت للارض بخجل نفس كلام بابا اللي بيقولهولي دايما هو للدرجه دي انا وحشه وبعدين فقت من افكاري ولاقيت انها فرصة يمكن اقنع جدو يخلصني من الجوازة دي

.. بص ياجدو خلي الموضوع دا بعدين خلينا في الاهم دلوقتي يعني انت يرضيك اني اتجوز واحد مش حباه ومش موافقه عليه

.. وهو انتي مش موافجة علي زين يا غنوة

.. تقصد ايه ياجدو

.. انتي بس زي ما جلتلك شيفاه عجبه في تحجيج حلمك مع انه يجدر يساعدك لكن الحجيجة انتي معجبه بيه ولو زين كان اتقدملك في ظروف تانيه انا متاكد انك كنتي وافجتي عليه

.. لا يا جدو انا عمري ما كنت هقبل بالوضع دا ليه اعيش في مكان مش عوزاه وسط ناس مش عوزاني واديك شايف مرات عمي واضح اوي انها مش عوزاني وليه اتجوز واحد جاهل اصلا