مقيدة باصفاد
عجزت عن الرد ولتكتمل تلك البهجة تعالى صوت رحيق التي أتت تركض من الداخل بسعادة تحتضن قطوف التي جلست على ركبتيها تحتضنها بحب وحنان وهي تمسح على خصلاتها..
قالت رحيق بسعادة:-
– شوفتي بيتنا يا قطوف .. جميل أووي وتعرفي من جوا في حاجات حلوه أووي.
جبريل قال أن أنتوا هتتجوزا وهنعيش كلنا مع بعض هنا..
قبلتها قطوف وقالت بسعادة مماثلة لسعادتها:-
– عجبني جدًا يا رحيق ومبسوطة جدًا أن عجبك .. هتفضلي معانا طول العمر وهنعيش بسعادة..
ركضت رحيق تلهو وتلعب بالأرجاء لتستقيم قطوف فتحدث جبريل بحزن داخلي يغمره:-
– أنا آسف جدًا يا قطوف على إللي عملته أختي وأمي كان المفروض مأخدكيش على هناك…
قاطعته قطوف قائلة بصرامة ويقين:-
– مش تقول كدا يا جبريل، أنا بقيت بنظر للأقدار بشكل تاني..
تعرف يمكن إللي حصل معانا دا كله من بداية حكايتنا هي إستجابة دعوة حد..
علشان رحيق .. دا كله حصل علشان رحيق وعلشان تقع في طريقي، ربنا رحيم لطيف .. سبب الأسباب دي كلها علشان ألتقى فيها ويكون لها بيت..
يعني تخيل اتجوزنا في البداية وأخدتني لبيتك مع والدتك وأختك في قرية بعيدة متخبية..
ولولا أنها مش اتقبلتني وقتها مكونتش نزلت اليوم ده أتمشى في القرية وأتقابل مع رحيق..
حتى كرهها وعدم تقبلها ليا نعمة لازم نشكر ربنا عليها..
إرادة ربنا وأقداره كلها لطف ورحمة..
ولازم إحنا مش نبص من عين ضيقة ونفكر في الأمور والأقدار بعيون تانيه وزوايا كويسه..
الحمد لله على كل شيء، أنا راضيه ومش زعلانه من أي حاجة..
وأنا مش عايزه أحرجهم يا جبريل وأخليهم يقفوا قدامي مش قادرين يرفعوا عيونهم..
أنا أقدر أعفو عنهم وعفيت ومش عايزه أفتح الموضوع تاني..
خلينا نفتح صفحة جديدة في كل حاجة..
لم يُصدق أن مَن تتحدث هي حقًا قطوف..
قطوف مليئة بالخير والطيبة التي تدثرها الصمت والحزن خلفه..
الجميع يمتلك بداخله كوامن الخير حقًا.
قبل مُقدمة رأسها وقال بتقدير وشكر:-
– ربنا يزيدك يا قطوف …ربنا يديمك ليا، شكرًا من قلبي يا قطوف..
ورفع صوته بينما يجذب قطوف بمرح:-
– رحيق .. رحيق يلا تعالي … بينا على المطبخ قدامنا معركة مستنيانا هناك وأنا واقع من الجوع..
ركضت خلفه وأصوات ضحكاتها التي اندثرت بداخل قلب يتيم وحيد بدأت تعلو في الأفق من جديد…
