حكاية جواد ملك ابراهيم
قامت وفكت الدبابيس من على شعرها بتعب، ومدت إيديها ورا ضهرها وفتحت سوستة الفستان بالعافية. الفستان وقع على الأرض زي كوم تلج، وسابته مكانه من غير ما تبص عليه. فتحت الشنطة الصغيرة اللي جابتها معاها من بيت أبوها ولقت فيها بيجامة قطن بسيطة وردي فاتح، لبستها ونفست الصعداء لأول مرة من الصبح براحة بسيطة دافية.
قعدت على السرير، وفردت شعرها الطويل الأسود على كتفيها، وحاولت تفرد ضهرها بعد اليوم الطويل بتعب ناعم. بصت للسقف وهمست بصوت مبحوح كله رجاء: “يا رب صبرني.”
وفجأة، الباب اتفتح.
عطر اتنفضت من مكانها بفزعة، وراحت شدت الغطا بسرعة على جسمها لحد دقنها، وبصت ناحية الباب بعيون واسعة من الخوف والخجل.
واللي دخل مكانش عجوز ولا دقنه بيضا.
كان شاب طويل، عريض الكتفين، لابس جلابية بيضا نضيفة ، وملامحه… ملامحه كانت أحلى من أي حاجة اتخيلتها، بهيبة هادية تذوب القلب. عيونه سودا واسعة فيها هيبة وهدوء، وفكه مشدود وفيه جدية، ودقنه خفيفة مظبوطة تتماشى مع وشه. وقف عند الباب وهو متردد، كأنه حاسس إن الأوضة مش أوضته، ونظرته فيها حيرة رقيقة.
عطر قالتها بسرعة وصوتها طالع مبحوح من الخضة والكسوف: “إنت مين؟ إنت دخلت إزاي؟ أنا هصرخ!”
الشاب رفع حواجبه باستغراب لطيف ونظرة مندهشة حنينة، وبصوت عميق هادي دافي قال: “أنا جوزك.”
سكتت بذهول وقلبها وقع.
كمل بهدوء رجولي يطمن، وقال: “أنا جواد الجبالي.”
الكلمة نزلت عليها زي الصاعقة بذهول وحلاوة. جواد الجبالي؟ ده؟ ده اللي كانت فاكراه راجل كبير في السن بيتسند على عصاية؟ ده شاب في التلاتين، وسيم لدرجة تخض. اتسمرت مكانها، وإيديها نزلت بالغطا من غير ما تحس، وقامت وقفت على السرير نفسه من الصدمة، وبصت له بعيون مفتوحة على آخرها بدهشة طفولية بريئة.
نست إنها لابسة بيجامة. وإن شعرها مفرود مكشوف على ضهرها وكتافها.
وجواد وقف مكانه، وفجأة نسي كل الكلام اللي كان جاي يقوله، وقلبه دق دقة قوية أول مرة يحسها. شاف قدامه بنت جميلة ، بشرتها بيضا زي اللبن وخدودها حمرا من البكا، وعيونها واسعة لونها بني فاتح لامع من الدموع، وشعرها الأسود نازل زي الحرير على ضهرها. جمال هادي مش مصطنع، جمال بيدخل القلب من غير استئذان.
حكايات الكاتبة ملك إبراهيم
شفايفه اتحركت من غير ما يقصد، وهمس بصوت خاشع كله إعجاب ودعاء من القلب: “بسم الله… ما شاء الله.”
