القاضي المتهم بقلم سيلا وليد

-طلقني ياحضرة القاضي..الاتفاق انتهى ، حملت وربنا عاقبنا، كفاية لحد كدا، لا انا هقدر اسامحك ولا إنت هتقدر تسامحني

-رهف ممكن نأجل كلام دلوقتي

صرخت به قائلة:

-طلقني واطلع برة ..قالتها بأعين يتطاير منها الشرر، رغم شحوب وجهها

نزلت كلماتها كسهام مسمومة أصابته بعدم القدرة على الحركة..ظل لفترة وهو يرى عبراتها التي سقطت على صدره تكويه بنيران الندم

انفرطت الايام واحد تلو الأخر والحال تفاقم بينهما، رهف التي استقلت بمنزل والدتها وبدر الذي غادر البلاد لبعض الأيام حتى تهدئ الأمور بينهما

ولجت والدتها بطعامها، وضعته على الطاولة بجوار الفراش، وجلست بجوارها تمسد على خصلاتها

-هتفضلي لحد امتى كدا، ناوية على ايه، وقبل ما تقولي حاجة

-بدر بيحبك، صدقيني يابنتي انا أعرفه اكتر منك

تمددت على الفراش

-ماما عايزة انام، ممكن تاخدي الأكل وتسبيني لو سمحتي

تنهدت والدتها ، ثم تحدثت بهدوء:

-كفاية لحد كدا يارهف، من إمتى وإنتِ ضعيفة يابنتي، قومي خدي شاور، وفوقي جوزك كلمني وقالي هيجي بعد شوية، ينفع يرجع يلاقي حالتك كدا، كفاية أنه بعد علشان ترتاحي

-ماما لو سمحتي لو بتحبيني سبيني أنام، ومش عايزة أشوف حد لو سمحتي

بفيلا القاضي بعد وصول بدر بعدة ساعات ..استمع على طرقات غرفته، فتح عيناه من نومٍ متقطع

-ادخل، دلفت العاملة قائلة بإحترام:

-الاستاذة انجي تحت وبتقول مش هتمشي غير لما تقابل حضرتك

أطبق على جفنيه، ثم زفر الهواء المكبوت بداخل صدره

فأشار بكفيه لتحركها قائلاً:

-تمام قوليلها شوية ونازل

هبط بعد القليل ..كانت تجلس بجوار أيوب، وصل إليهما ولكنه تسمر بوقفته عندما وقعت أنظاره على أيوب، واصل خطواته إليهما

حتى توقف أمامهما، وعقله يرسم سنيورهات

-خير، ايه سبب الزيارة الكريمة دي !!

توقفت انجي أمامه وهتفت

-جاية علشان حاجتين ، أشارت على أيوب

-اعرفك أيوب خطيبي وفرحنا بعد شهر ..ثم تحركت خطوة وهي تنظر إلى مقلتيه بغضب

-أنا ممكن كنت شاركت معاك في ضياع حياة اختي في الأول ورضيت انك تتجوزها وانا عارفة ومتأكدة إنك واخدها انتقام، وجيت هنا رمتها بالباطل قولتلك أنها على علاقة بأيوب، لكن رهف عمرها ماحبت أيوب، هما قربوا فترة وهي ماارتحتش، وللأسف أنا شاركتك كسرتها ووجعها ،لكن اعمل حسابك ياحضرة القاضي انك المتهم الأول اللي وصل اختي لحالتها دي، انت في المقام الأول وبابا كمان مشترك معاك، بس لحد هنا وكفاية بقى، عايز توصل لأيه، انت عارف ومتأكد من حب رهف بس حضرتك عملت ايه، كنت السبب في ضياع حياتها