الداغر اسماء الاباصيري

تناولو الافطار لتذهب والدته بعد ذلك لاعداد الشاي خاصته تعاونها تاج به فى حين اتجه هو لغرفته لاستكمال اعماله

بالمطبخ

حنان : يا بنتى اقعدى ارتاحي .. ملوش لزوم اللى بتعمليه ده … يعنى هي كوباية الشاي اللى هتتعبني يعنى

تاج بإبتسامة : انا بحب اعمل الشاي من ساعة ما علمتيني اعمله ازاى و كمان الطبيخ و الحجات دي … ثم اردفت بحزن …. اديني بتسلى بدل قعدتى من غير ما اعمل حاجة كده …… بجد بزهق من الملل ده

حنان : عارفة انك زهقتى …. يعنى انا عادي فى البيت بإستمرار بسبب انى ست كبيرة و اتعودت على كده … لكن انتى عروسة جميلة طبيعي تزهقى من القعدة معايا

تاج بسرعة : لا طبعاً مزهقتش من القاعدة مع حضرتك يا ماما انا بس يعنى كنت عايزة اشوف الدنيا برة عاملة ازاى … بقالى تلات سنين فى المستشفى و قبلهم مش فاكرة حاجة …. رغم انى عارفة انه لو حصل و خرجت هبقى مرعوبة ابقى لوحدي و اتعامل مع حد غريب زي ما كنت اول ما جيت هنا

حنان: كل حاجة محتاجة تعود ومسيرك هتخرجى و تشوفى الدنيا و تتمتعي بيها …. بس عارفة اكتر حاجة مفرحانى منك …… انك بقيتي تقوليلى يا ماما

تاج بتوتر : ده لو مكنش يضايق حضرتك

حنان : بس يابت بلاش عبط يضايقنى ده ايه …. ثم نقلت انظارها للموقد …… شوفى المية ابتدت تغلي اهي

تاج : حاضر … هقوم اعملها و اديهاله و ارجعلك تاني

حنان بحب : ماشي يا بنتى و انا هستناكي فى اوضتى

تحركت لانهاء كوب الشاي خاصته لتتحرك الى الخارج نحو غرفته …. طرقت الباب لتسمعه يسمح لها بالدخول … دلفت للداخل لتجده يهاتف احدهم …. اقتربت منه و وضعت الصينية على الطاولة ومن ثم انتظرت حين انتهائه من حديثه

داغر : ياباشا نقلي لمكان تانى هيبقى اقل عقاب ممكن اتجازى بيه بعد تقصيري ….. ايوة ياباشا … خلاص فيش داعى يا افندم تزعل نفسك …. انا فاهم كويس انه مش بأيد حضرتك … تمام يا باشا … سلام

انهى المكالمة لترتسم ابتسامة صغيرة على محياه هامساً

داغر : جت من عند ربنا

و من ثم التفت نحوها يطالعها بتساؤل لتتنحنح فى حرج هاتفة

تاج : انا….. آآ كنت عايزة اطلب منك طلب و اسألك سؤال

داغر بتهكم : طلب و سؤال مرة واحدة ….. خير ؟

تاج : انت مش قولت اول ما جيت هنا ان وجودي من غير خروج او حرية هيكون مؤقت و انك هتشوف حل للموضوع ده …. ادي بقالى اسبوع وكام يوم هنا من غير اى جديد