خلف الظلال 2
عادل : طيب انتى ايه رأيك اشيل الورق والنسخ فين ؟عند امى ولا فى الخزنه اللى فى البنك ؟
صرخت منال : عند امك ده ايه!!!!…. لاء طبعا فى الخزنه اللى فى البنك واهو معاك التوكيل بتاع هاله تقدر تفتحها وتروح تجيبه فى اى وقت
عادل مستفهما: ولا اعملى خزنه جديد باسمى ؟
قامت منال واتجهت اليه وقالت : لاء طبعا اوعى تعمل حاجه زى كده ..انت العين بقت كبيره عليك دلوقتى… انما خزنه حتى هاله ماتعرفش انها عندها.. مين هيعرف انها موجوده
عادل : مش بقولك دماغ
منال بمكر : انا نصك التانى ..انا اخطط وادبر وانت تنفذ يا روح قلبى ..وزى ما خلصتك من هاله …هنخلص انا وانت سوا من المرشدى وسالم ولا حد يبقى ليه فضل علينا
وفى اليوم التالى اتجه سالم الى المعرض وما ان دخله حتى دارت عيناه كالصقر يبحث عن اى تغير كان قد حدث
الا ان شيئا لم يتغير فمازالت السيارات الى تحوى بضاعته المحظوره كما هى لم يمسسها بشر
وقاد قلبه قدماه الى حيث هى لم يدرى لما ولكنه اطاعه
دخل غرفتها ليجدها جالسه ..ساكنه
يحتضن كفها جبهتها وخواء قلبها قد طبع اثره على فكرها فأصبح خاويا هو الاخر على الرغم من تزاحم الافكار والخواطر والاسئله
وقف سالم يتأملها لبرهه وظل يفكر ..هل كانت امه على هذه الحاله يوم ان تركته مرغمه ؟؟؟؟؟؟
وبعند رفض عقله تصديق تلك الاكذوبه فما ان يظهر رجل جديد فى حياتها حتى تنسى اولادها كما فعلت امه
فقال بصوت قاس : خير ..حد مات؟
رفعت هاله عيناها وانتبهت الى وجوده وقامت وقالت متلعثمه : خير يا افندم ؟
نظر لها سالم وقال مقتضبا : مالك؟
هزت هاله رأسها نافيه : مافيش
قال سالم بمكر : عملتى ايه بالملف اللى اديتهولك؟
فرت دمعه من عين هاله وقالت بصوت مخنوق : ملقتهومش
فتح سالم عيناه بدهشه وقال : دورتى عليهم فى كل العناويين
هزت هاله رأسها بأيجاب : كل العنواين …كلها …كان فيها وسابها …بيأجر ويتنقل
سألها سالم : روحتى الفيلا اللى فى القطاميه
اجابت هاله : روحتها ..طلعت برضه متأجره وسابها من سنه
نظر لها سالم باستغراب وقال : روحتيها امتى ؟
هاله : فى نفس اليوم اللى اخدت فيه الملف لفيت على العنواين كلهم
نظر لها سالم غير مصدقا ثم جلس و قال : ماتقلقيش بكره هيبان …المهم ..ايه اللى حصل امبارح ؟
ردت هاله : ابدا فجأه الكهربا قطعت وسمعنا صوت فرقعه جامده شويه والمهندس وليد لقى التكييف فى اوضتك بيطلع دخان فاتصلو ببتوع الصيانه وجم وطلعنا وقفنا بره بتاع قيمه ساعه الا ربع كده …لان حضرتك طبعا عارف ان الجو بره ادفى من جوه المعرض
