خلف الظلال 2
ننح : يا باشا خيرك مغرقنا
صمم رفيق : امسك …بس عارف لو طلعت فى حاجه فى الكاميرات ..هعمل فيك ايه ؟
ننح بصوت خفيض: انت هتعرف انى خدمتك احلى خدمه لما تشوف …وتسمع كمان .ماهوا انا زرعتلك جهازين تصنت فى اوضه سالم…. وفى صاله المعرض تحت ..ودوول كادو جدعنه منى
ابتسم رفيق وخبط على كتفيه بخفه : تسلم..تصدق عدت عليا
اومأ ننح برأسه : لكن ماتعديش عليا يا باشا
انصرف ننح برفقه رفاقه ودخل رفيق المعرض وقال لوليد : هاه تمام كده ؟
وليد : تمام يا باشا ..المعرض رجع نور بصحابه
عقد رفيق حاجبيه وقال بمكر : انما انا ماشوفتكش واقف مع الرجاله ليه ؟
وليد : هه..لا اصل قلت طالما حضرتك معاهم يبقى انا عينى على العربيات …حد فيهم يعمل حاجه كده ولا كده ..يخلع لامؤخذه جهاز كاسيت ولا حاجه .ما انا اصلى عارف الاشكال دى
ضحك رفيق قائلا : جدع ..تعجبنى
وعلى الجهه الاخرى كان سالم جالسا برفقه عادل بعدما انتهو من احتساء القهوه فى غرفه مكتب الاخير
فقال سالم : هاه يا عادل …مطلوب ايه ؟
اشار له عادل بكلتا يديه… فاتسعت عينا سالم قائلا فى ذهول : عشره!!!!!!!!!!!!!!!
كشر عادل عن انيابه وقال : ايه كتير ؟
سالم ببرود: انت شايف ايه ؟
عادل ثائرا : شايف انه حقى …والصراحه يادوب كمان …ده كسب من وره الورق ده مليارات ..خساره فيا 10 مليون ..دوول ولا حاجه
سالم : يا عادل اعمل لبكره …احنا كنا يوم من الايام زيتنا فى دقيقنا برضه
عادل بصوت ملول: لا خلاص سيبتلكو الجمل بما حمل وعايز اعيش واتمتع بالفلوس …وخليكو فى اللى كوشتو عليه واللى لسه هتنهبوه ..اما انا خلاص
سالم بهدوء: الدنيا اخد وعطا ويوم ليك ويوم عليك …ممكن بكره تحتاجنا برضه
اشاح عادل بيده قائلا : لا ياعم انا مش محتاجلكم فى حاجه ..انا ليا البيزنس بتاعى دلوقتى …وانتو ليكو البيزنس بتاعكو ..يفتح الله
رجع سالم واسندر ظهره الى الكرسى الوثير وقال : بس هوا مش هيرضى يدفعلك المبلغ ده كله
عادل بعصبيه : اقنعه ..هوا فاكر ايه ..فاكرنا عبيد ولا خدامين عند اللى خلفوه ..
ثم اتبع بصوت منخفض :دا انا دخلت مراتى.. ام عيالى السجن عشان خاطره ..وحرمت عيالى امن امهم لاخر عمرهم برضه عشان خاطره …عشان ياخد شركه الملاحه اللى عن طريقها بيدخل للبلد كل اللى هوا عايزه ويخرج اللى هوا عايزه ….من غير لاحس ولاخبر …وبتراب الفلوس كمان …ده ال10 مليون دوول مايجوش تمن الشركه والاراضى اللى اخدها بالعقود والاوراق المزوره اللى عملتهاله
