خلف الظلال 2
عادل بضيق: بقولك ايه اتمسى وقولى يا مسا ….وصله الردح بتاعه كل ليله دى انا مش ناقصك
منال وقد اخفضت صوتها : طيب خلاص ..خلاص …ماتنرفزش روحك ..بس يعنى مش انا اللى يتقالى الكلام ده يا عادوله احنا برضه شركا فى كل حاجه ..جواز وبيزنس ..هاه سالم جاى عايز ايه ؟بخصوص الورق اللى معاك صح ؟
عادل مؤكدا: صح ..ارتحتى
منال : طيب جميل اتفقتو على كام
عادل باقتضاب : سبعه
منال مستنكره : بس؟؟؟؟…
ثم تابعت بتهديد ….عليا يا عادل ؟؟
عادل : مش هيدفعوا اكتر من كده انا عارف
منال : ماشى ماشى ..اتفقتوا على ميعاد تسلم وتستلم ؟
عادل : لسه بس غالبا هيبقى فى المعرض بتاع جوز اخته
منال : ومايجيش يسلمك هنا ليه ؟
عادل : قالى مشغول ومش كل شويه يسافر
عضت منال شفتها السفلى وقالت بقلق: انا قلبى مش مطمن
عادل : ليه بس ؟
منال: وانت ايش ضمنك مايمكن يغدر بيك وياخد الورق ومايديكش الفلوس
عادل غاضبا : ليه ..عيل صغير اياك ؟
اجلسته منال الى جوارها على طرف الفراش الوثير وقالت بدهاء : اسمع كلامى ..دول عالم *****…خد معاك نص الورق بس عشان يبقى قلبه مطمن يديك نص المبلغ وتتفقوا على مكان تانى بشروطك المره دى وتستلم منه بقيه المبلغ وتديله بقية الورق وخلى معاك نسخ للورق احتياطى تحطهم فى مكان مايعرفوش الجن الازرق مهما ان كان يمكن يوم تحتاجهم لحاجه
حك عادل ذقنه وقال : فكرك هيرضى ولا هيفتكر انى بلاعبه …وبعدين النسخ ولا ليها اى لازمه …
منال : وتلاعبه ليه انت وعاوز الفلوس وهو وعاوز الورق بس انت بتأمن نفسك ..الحق حق …وبالنسبه للنسخ العيار اللى مايصبش يدوش…. بكره ماحدش عارف فيه ايه
رد عادل وقد لمعت عيناه : صح كده …دا انتى عليكى عقل …ذرى
رفعت منال اصابعها الخمسه بوجهه وقالت : الله اكبر… المهم نصيبى يجينى لحد عندى انت فاهم 5 مليون ماينقصوش مليم
عادل مستنكرا: 5 ..5 ليه ؟
منال بهدوء: النص بالنص..انت نسيت ولا ايه؟
عادل : ال7 نصهم 3 ونص ..يانصابه
منال : اهوانت اللى نصاب ..انا سمعاك بودانى اللى هياكلهم الدود دوول طلبت منه 10 ولو طول هيبقو 20 ..عيب عليك
قام عادل وقال غاضبا : يابت الايه يعنى انتى من الاول عارفه مين اللى كان هنا والحوار كله …وفتحالى تحقيق على ايه ان شاء الله
ابتسمت منال ثم ضحكت وقالت : ما انا اصلى عارفاك يا عادوله وعارفه قلبك الابيض وطيبته وسالم ده حاوى خفت لياكلك فى الكلام فقلت خلينى اسمع لحد ما اشوف ميته ايه …
