احببتك ولكن 2

هنا ببعض الارتياح: أنا مش فاهمة حاجة، هو في إيه؟
حسناء: زي ما قلتلك، هندردش مع بعض شوية. ها يا ستي، مش هتقوليلي أسمك إيه؟
هنا وقد أحست بالارتياح معها : هنا.
حسناء بابتسامة: أسمك جميل قوي.

ثم بدأت تتحدث معها، ولكن لم تجد أي تجاوب من هنا.

حسناء لكي تبدأ تجعلها تتحدث وتبوح بما في داخلها: عارفة يا هنا، بالرغم إني دكتورة نفسية، بس ساعات بكون محتاجة أحكي وأفضفض لحد عن اللي جوايا. الكتمان في بعض الأحيان بيخلينا ضعاف قوي، بيخلي الحزن ديماً مسيطر علينا. مش هقولك كل الأمور لازم تبوحي بيها، لأن كل واحد عنده أسرار وخصوصيات بيخبيها عن أقرب الناس ليه، بس في حاجات لما بنبوح بيها بنحس إننا أرتاحنا قوي عكس ما كنا مخبيناها، فهماني يا هنا؟
هزت لها هنا رأسها ولم تتحدث.
حسناء: ممكن تحكيلي عن نفسك شوية؟ إيه هي صفاتك؟ الحاجات اللي بتحبيها تكون في الناس القريبين منك، والحاجات اللي مابتحبيش تشوفيها فيهم؟ يعني كلميني عن نفسك شوية.

أرتاحت هنا إليها وبدأت تتحدث، بالرغم أن هذا ليس من طبيعتها، ولكنها كانت بحاجة لشخص تتحدث معه.
حسناء بابتسامة: كدة أقولك تقدري تتفضلي، بس متنسيش المتابعة الأسبوع الجاي.
هنا بابتسامة: إن شاء الله، عن إذنك.
كان حسام ينتظرها لقرابة ساعة ونصف.
أتت إليه دون أن تتحدث بكلمة، ولا هو أيضاً تحدث معها.
وفي السيارة، بدأ الجليد يهطل. كانت هنا تنظر إليه وهي مستمتعة به مثل الطفل الصغير؛ كان منظر الجليد جميلاً للغاية، أمراً لم تعتاد عليه من قبل لأنها لم تسافر خارج مصر.
هنا: ممكن توقف العربية يا حسام لو سمحت؟
حسام بدهشة: ليه؟ فيكي حاجة؟
هنا: بس وقفها، معلش.
استعجب حسام من طلبها، ولكن أوقف السيارة.
فتحت هنا الباب، ثم وقفت ورفعت ذراعيها ونظرت للسماء وبدأت تبتسم.
أخذ حسام ينظر إليها ويبتسم على فعلتها هذه، وتذكر يوم سفرية العين السخنة عندما رأها للمرة الثالثة وهي تبني قَصراً من الرمل. أفاق حسام من شروده سريعاً وخرج إليها.
حسام بخوف: يلا أدخلي العربية، هتتعبي كده ومش هتستحملي.
هنا برجاء: أنا عايزة أقف شوية.
لم يستجب حسام لطلبها ومسك يدها وأدخلها السيارة وأنطلق.
حسام: متجوز طفلة أنا ، نفسي تسمعي الكلام لو مرة واحدة.
هنا بحزن: معلش، نصيبك بقي كده يا بشمهندس تتجوز واحدة زيي، متقلقش؛ عدي من السنة أسبوع وهتخلص مني وتشوف حياتك مع واحدة عاقلة ولسا بنت.