شظايا قلوب محترقه من الفصل ال33 | Romantic Story Chapter
دلفَ للداخلِ ملقيًا التحيةَ على الجميع، سحبَ كفَّها واتَّجهَ يجلسُ بجوارِ والدهِ بمكانهِ المخصَّص، جذبَ مقعدها وأشارَ إليها بعينيه، جلست بهدوء، وقعت عيناها على رؤى التي تقابلها، فسحبت نظرها الى إيلين:
-نوَّرتي يادكتورة، شوفتي طلعنا قرايب..
ابتسمت إيلين تنظرُ إلى آدم:
-أيوة عرفت من آدم وكمان رؤى..
بترت حديثهما رؤى قائلة:
-مش قولت لك ياإيلي، أهو طلعنا قرايب ومش بس كدا، طنط فريدة طلعت مرات عمِّنا، رمقت ميرال بنظرةٍ باردة:
-يعني ميرال مطلعتش بنتها، مجرَّد مربية..
-تعرفي تاكلي وإنتي ساكتة يابت وماسمعشِ صوتك، وبدل مابتحكي تاريخ العيلة كدا، فكَّري إزاي هتبرَّري خروجك امبارح بالليل من غير إذني…قالها إلياس وعيناه ترمقها بسهامٍ نارية..
أفلتَ اسلام ضحكةً وهو ينظرُ إلى صحنه:
-كانت بتجري ورا الفيران..
-ااااي خفَّة ياظريف..قاطعهم أرسلان:
-لا كانت بتعدِّ النجوم في السما، وفجأة واصطدمت في عربية روبابيكيا..
-دا فطار ولَّا مسرحية هزلية بقى..كلِّ واحد ياكل وهوَّ ساكت..قالها مصطفى بعدما اعتذر من زين..
آسفين يازين باشا، الولاد متعوِّدين لمَّا بيتلمُّوا على بعض بيطلَّعوا مواهبهم..
-كلِّموا أبوكو، أنا جاي لأمي..
-لا وإنتَ قبلهم ياحضرة المهندس..التفتَ أرسلان إلى يزن:
-رد على عمُّو مصطفى إنتَ مبتسمعش؟..
-أرسلان..قالها إلياس وهو ينظرُ بعينيهِ إلى الطعام ..نهضَ من مكانهِ وجذبَ بعض الطعامِ من أمامه:
-عارف إنَّك خايف عليَّا علشان كدا بتقولِّي خد أكلك..
-بس ياله، احترم نفسك الناس تقول علينا إيه؟..
التفتَ برأسهِ إلى زين:
-حضرتك منوَّرنا والله، ياريتنا اتعرَّفنا عليك من زمان..ثمَّ اتَّجهَ إلى آدم وأحمد:
-منوَّرين والله يا ولاد خالي..مش كدا صح ياستِّ الكل؟..
ابتسمَ زين ينظرُ إلى فريدة:
-مش معقول، دا أرسلان اللي قولتي عليه؟..
-لا..قالها إلياس وهو يمضغُ طعامه، ثمَّ استأنفَ حديثه:
-دا واحد لقيينه على بابِ الجامع..
-اسمَ الله عليك ياأخويا، وإنتَ لقيناك على بابِ الدار..
قهقهَ إسلام يشيرُ على نفسه:
-وأنا لقيتوني في بطنِ سمكة، غمزَ إلى يزن ماتقولِّي ياعمِّ المهندس وإنتَ حدفوك في البحر، واتقابلنا في بطن البحر..ارتفعت الضحكات إلى أن قاطعم صوتُ فريدة وهي تطلَّعُ إلى ميرال:
-حبيبتي قرّّبي لجوزك أكله، منتظرة إيه؟..نسيتي إنِّ دا بيتك، أوعي تتعاملي على إنِّك ضيفة مهما يحصل..
