دموع ممنوعة القسم الاول

انتفض من الصوت وكأن لدغه ثعبان

…سهام ، انتى اتجننتى ، ايه اللى جابك هنا دلوقتى ، وافرضى حد شافك باللى انتى عملتيه ده …

…هو انا عملت ايه ، متنساش انك ابن عمى ..

…سهام ، لمى الدور ، واتفضلى ادخلى وخللى ليلتك تعدى على خير …

… إيه ياعادل ، انا بس كنت عايزة أطمن عليك ، حسيت انك كنت مدايق اوى على الغدا ، ولقيتك خارج لوحدك من شوية ، فقلقت عليك …

… وبعدين بقى ، انتى مالك ومالى ، إلا ماكنتى بتقلقى عليا اصلا واحنا متجوزين ، جاية تقلقى عليا دلوقتى ، العبى غيرها ، اقولك على حاجة ، انا اللى ماشى ، تصبحى على زفت ، كانت ناقصاكى انتى كمان تختميلى الليلة …

همست سهام بصوت منخفض نسبيا

…ماشى ياعادل ، مسير الحى يتلاقى ، وحياتك عندى لأفركشهالك ، ويكون طلاقك على ايدى ، مش سهام اللى تطلق وتترمى كدة ، وتكون مكانى واحدة زى دى ، دا انا سهام المصرى ….

دموع ممنوعة. . . . . . . . . الفصل الثانى عشر

فى نفس الوقت التى كانت تحاول فيه سهام التقرب من عادل ، قررت سميرة أن تبدأ فيه طريق الإساءة لفريدة ، لم تكن تعلم أن فريدة ليست مثل الأخريات ، وبالطبع لم تكن تعلم أنها تحمل لها الكثير والكثير داخلها ، وأنها تنتظر مجرد فرصة للانقضاض عليها .

هى تعلم أنه غير موجود ، فقد رأته وهو خارج وهى أيضا من ارسلت سهام خلفه ، ثم صعدت هى لفريدة

فتحت الباب ودخلت حتى بدون استئذان ، كانت فريدة تتحدث مع العميل المتفق على محادثته تيليفونيا فى الساعة الثامنة ، التفتت ووجدتها أمامها ، كادت تصرخ من المفاجأة ، حتى أن الرجل سمع شهقتها من خلال التيليفون ، تأسف له وأنهت معه الحوار .

…أنتى ازاى تدخلى من غير استأذان …

…البيت ده كله بيتى ، وادخل آى مكان فيه زى منا عايزة …

…أاااااااه ، بيتك …

…طبعا بيتى ، ولو مش عارفة تعرفى …

اتجهت فريدة لأحد الكراسى ، جلست عليه ووضعت قدم فوق الأخرى ، وقالت

…ومين بقى اللى هيعرفنى ….

…أنا طبعا ،ومش كدة وبس ، كمان هعرفك أذاى تعاملى جوزك ومتنكديش عليه وهو مبقالوش 10 أيام متجوز ….

…وهو اشتكالك ؟

…هو محتاج يشتكى ، كفاية اللى باين على وشه ، ولا انتى فاكرة عشان بتشتغلى يبقى هتاخدى قلم فى نفسك …

…اااه ، باين على وشه ، بتشتغلى ، قلم فى نفسك ،، وماله ، وهتعرفينى أذاى بقى ؟ …

…هعلمك من أول وجديد أذاى تتعاملى معاه ، أصل أمك ماتت بدرى بدرى وملحقتش تربيكى ، انا بقى اللى هربيكى ..