دموع ممنوعة القسم الاول

… الملف ده فى كل البيانات المنشوره عنه ، على النت أو فى الجرايد ، أو حتى الكلام المتداول بين الناس ، هتعملوا نسخة منه لكل واحد فيكوا ، وتدرسوه كويس اوى ، وتبداوا منه ، عايزة بداية صح ، وهنشوف سلطته دى هتوصله لفين ، أى اسألة …

…اتفضلوا ..

التفتت لريهام التى ما تزال واقفة مكانها

…إيه ياريهام واقفة كدة ليه …

…مستنياكى تخلصى ، أصل أستاذ عادل برة …

…عادل مين …

…أنتى تعرفى كام عادل ، جوزك يافيري ، العريس ياعروسة …

…ودى ايه اللى جابه ؟

…يمكن وحشيته ، أول يوم تبعدى عنه بقى ..

…طيب روحى ياظريفة ، ودخليه …

خرجت ريهام ، ودخل عادل بعدها بثوانى ،

… شرفت مكتبنا المتواضع …

… هو كدة متواضع ، انا مكنتش متخيل انه كبير وشيك كدة ، مليان مكاتب وموظفين ، ده شركة كبيرة مش مكتب …

…مش للدرجة دى …

…بجد ، انتى طلعتى جامدة اوى وانا مش واخد بالى…

…أنت كنت فاكرنى صغيرة ولا ايه …

…لا ابدا ، انا كلمتك كتير على فكرة …

…والله ، يمكن مسمعتش ، معلش ، عندى حاجات كتير اوى ، ولازم يخلص معظمها انهارضة …

…خلصى الباقى بكرة ، ويلا عشان نروح بقى …

..مينفعش، انت ناسى أنى راجعة الحكومى بكرة ، آخر يوم فى اجازتى انهارضة ، يعنى هاجى المكتب بعد الضهر ، والوقت هيبقى محدود …

..يعنى إيه ، مش هتيجى معايا ، انا قلت هنروح سوا …

…مينفعش ، عندى شغل ..

…لا يافريدة ، البيت كله بيتجمع على الغدا ، الساعة خمسة ، دى عادة ومحدش بيخالفها ، لو سمحتى عودى نفسك تكونى موجودة ، مش اول يوم خروج للشغل متحضريش الغدا ..

… خلاص ياعادل ، دقيقتين وهقوم معاك …

رفعت السماعة وطلبت من ريهام الدخول

…أيوة ياأستاذة …

…اجلى مناقشة الملف التالت لبكرة ، ولو فى حاجة ضرورى بلغينى بالتيليفون عشان همشى دلوقتى …

…وناصر السخاوي ….

…كلميه واجلى الميعاد وقوليله أنى هكلمه فون على الساعة 8 …

…تمام

جمعت فريدة اشيائها فى شنطتها ، بالاضافة لل CD الموجود عليه التسجيل الخاص بعادل مع من يحبها ، فهى لم تستمع له بعد ،
خرجا من المبنى سويا ، تركت فريدة سيارتها ، واستقلت مع عادل سيارته ، بقيا معظم الطريق دون أن يتحدثا ، قبل الوصول الفيلا بقليل قرر أن يسألها، ففضوله يقـ,ـتله لمعرفة ما كانت تفكر فيه ،

…مقولتليش ، كنتى بتفكرى في ايه لما كلمتك انهارضة …

ابتسمت فريدة وسألته. ..تفرق معاك ..