دموع ممنوعة القسم الاول

..براحة شوية يارشا …

…استنى انتى ياريهام لو سمحتى ، صح يافريدة ولا لأ …

…صح يارشا …

…تمام ، الاعتراف اول خطوة صحيحة للعلاج …

…يعنى إيه ؟

..يعنى تشوفى انتى عايزة ايه ياريسة ، دلوقتى انتى لو كملتى اللى انتى ناوية عليه من ناحية اهله ، بيتهيئلى صعب انه يسامحك ، يبقى هتتطلقوا ، ونقول مثلا انك هتحاولى تبدأى من جديد ، حب وارتباط وجواز ، تفتكرى بشخصيتك وطريقتك دى ، هتعملى الموضوع ده فى قد ايه ….

لم ترد فريدة

…اقولك انا ، هتاخدى من 3 ل 5 سنين ، صح ،
حلينى بقى لحد ما ربنا يفكها معاكى ، واللى هتتجوزيه هيطلع كويس ولا هيدخل البلاك ليست بتاعتك ، ، وممكن يكون فى حل تانى ، وكل الشواهد بتقول أن هو الأمثل …

…اللى هو ايه …

…انك تتمى جوازك بعادل …

…إيه …

…من غير ايه ، انتى بنفسك اعترفتى انك مشدوداله، وهو كمان نفس النظام ، يبقى ايه المشكلة …

هنا رن هاتف المكتب ، قالت ريهام

…الشغل هيبدأ ، انا هروح أرد ، وانتى يافريدة روحى استلمى شغلك وسيبك من البت الهبلة أم كلام ماسخ دى …
ثم خرجت وأغلقت الباب

…اسمعينى كويس يافريدة ، كدة كدة الجوازة دى اتحسبت عليكى ، عيشى يافيري ، حبى وعيشى، ومبقولكيش كنسلى اللى انتى ناوية عليه ، لكن متخليهوش يكون حيطة بينك وبين حياتك ، ويمكن يحصل حمل …

…حمل …

…أه ، حمل ، ايه يعنى ، انا متأكدة انه هيخلى حياتك جنة وهيبيضلك السواد الموجود جواكى ،ويمكن بسببه عادل يسامحك …

…طيب يافالحة ، انتى سهلتى كل الأمور ، لكن فى حاجة واحدة هى اللى هتكسر السيناريو اللى انتى رسمتيه ده ، أن عادل مرتبط ، بيحب ، متفق مع واحدة تانية على الجواز بعد ما يطلقنى. ..

…وكان برده متفق معاها على الجواز قبل ما يطلق بنت عمه …

…تقصدى ايه …

…أقصد أن شكلها بنت مش مظبوطة، كانت مقضياها مع واحد متجوز ومستنياه يطلق ، ولما طلق ، برده متجوزهاش، وراح اتجوز واحدة تانية ، وبرده مستنياه لما يطلق التانية ، انتى مش شايفة أن الموضوع كدة مش مبلوع …

…تقصدى انهم متصاحبين ، عشان كدة هى مش قادرة تسيبه …

…معتقدش، المفروض أنك عرفتى عادل ، تفكرى انه من النوع اللى يصاحب ، يزنى يعنى ، لأ ،
الموضوع فيه إن ، وكأن كمان ، يومين وهجبلك الخبر اليقين ، وبعدين ياحلوة ، لو هو بيحبها كدة ، متجوزهاش اول ما طلق ليه ؟ موقفش قدام اهله ورفض جوازه منك عشانها ليه ، الموضوع ده مايع ، هيطلع فشنك فى الآخر ، اسألينى انا ، ده انا بقيت خبرة في الحاجات دى ، بسبب الل بيحصلى مع جوزى ، بس سيبك ، الأهم دلوقتى انك تفكرى فى كلامى كويس ، ومش بس كدة ، لو عادل حاول يقربلك متصديش وتركبى الوش الخشب يافريدة ، حتى لو مفيش حاجة هتم بينكم ، اديله ريق حلو ، افتحى الحنفية شوية ، اوعدينى يافريدة ، متضيعيش عمرك فى الفاضى …