مابين الحب والحرمان 2

– إيه كنت فاكرة هاصحيكي بالورد و الأحضان، ده أنا لسه هوريكي النجوم في عز الضهر يا حرامية.

أنقض علي تلابيب عبائتها و هدر بها:
– فلوسي فين يا بنت الـ…، خبتيهم عند خالتك و لا أمك؟

أخذت تلتقط أنفاسها من إثر ما أقترفه للتو ثم قالت و ترمقه بإزدراء :
– ريح نفسك أنا شيلتهم بإسم عيالك و أنا الواصية عليهم عشان ده حقهم اللي حرمتهم منهم طول السنين اللي فاتت.

أطلق قهقهة ساخرة ثم قبض علي خصلاتها و صاح بصوت فزع صغاره داخل الغرفة حيث أوصد عليهما الباب من الخارج:
– فاكراني أهبل يا بت عشان أصدق الحوار اللي ما يدخلش علي عقل عيل صغير، فوقي يا روح خالتك ده أنا حبشي نصار اللي يصيع علي بلد بحالها.

– اللي عندي قولته يا حبشي، عايز تصدق و لا ما تصدقش دي حاجة ترجع لك، و أنت عارفني ما بكذبش.

صفعها بقوة قائلاً:
– ما بتكذبيش اه لكن تسرقي، فلوسي فين يا مره.

صاح الصغيران بطرق عنيف علي الباب:
– ماما، ماما.

صاح بهما:
– أخرسوا بدل و عليا الطلاق من أمكم أجي أعلقكم بدالها.

أجهشت الأخري في البكاء فأخبرته بتوسل:
– خرج العيال و وديهم لخالتي يا حبشي، دول ملهمش ذنب.

– ذنبهم هو أن أمهم حرامية، خليهم محبوسين كده من غير ميه و لا أكل و أنتِ شرحه لحد ما تقولي علي مكان الفلوس.

ما زالت تبكي و قالت:
– يا خسارة يا حبشي، يا خسارة حبي ليك و أستحملت قسوتك و بخلك و أي حاجة عشان بحبك، عمري ما كنت أتوقع تعمل معايا كده، روح يا شيخ منك لله.

أخرج سيجاره من العلبة و قام بإشعالها ثم نفث الدخان من فمه:
– و النبي بلاش جو الصعبنيات ده يا ختي عشان أنتِ عرفاني كويس ما بياكلش معايا خالص، أنا كل اللي عايزه منك ترجعي لي فلوسي و أوعدك هخلصك من الشرير القاسي البخيل و أبقي روحي أتجوزي إبن خالتك السيس أهو ده مقامك.

رمقته بكل نظرات الكراهية التي تشعرها حياله الآن إلي هذا الحد عاشت معه في وهم كانت تدعوه الحب!
تذكرت حديث إبن خالتها الآن و شعرت بالفرق الشاسع بينهما، لكن ما الفائدة من الندم.
هيهات و أجفلها بدفن سيجارته المشتعلة في يدها المقيدة في المسند الجانبي للكرسي، فأطلقت صرخة ألم دوي صداها في كل الأرجاء.

صاح الصغار بذعر و خوف بمناداة والدتهما، لكن طغي صوت هذا الطاغي:
– قدامك دقيقة لو مقولتيش علي مكان الفلوس لهدخل للعيال دلوقت و هانزل عليهم ضرب بالحزام و خلي دماغك اللي أنشف من الحجر تنفعك.