شظايا قلوب محترقه من اافصل 37 الى 40 | Romantic Story Chapter

كانت كلماتها تخرجُ كالرصاص، تحملُ غضبها، قهرها، خوفها غير المعلن..نظرت إليه بعينينِ مليئتينِ بالرجاء:

“أنا بحاول من خلال رسالتي أحمي ابني وابنِ غيري زي ماإنتَ بتحاول تدافع عن بلدك…أنا كمان، بس مش بالسلاح.”

نظرَ إليها، هنا شعر قلبهِ بالانقباض، شعورًا بالعجزِ امتزجَ بحبٍّ لا يعرفُ كيف يتعاملُ معه..مدَّ يدهِ إلى خصلاتها ومسحَ عليها برفق، كأنَّها قطعةُ زجاجٍ يخشى أن تنكسرَ بين يديه:

“كمِّلي فطارك…وبعدها نكمِّل كلامنا.”

أشارَ إلى الطعام، وأردفَ بصوتٍ أهدأ لكنَّه مشبعٌ بالإصرار:

“أنا مش طالب منِّك غير إنك ماتحاوليش تخبِّي عليَّ حاجة، وموضوع التليفون التاني اللي بتشتغلي بيه من ورايا…بلاش منه، ميرال..أتمنَّى تحافظي على نفسك، وتأكدي…هعرف أيِّ حاجة مهما حاولتي تخبيها.”

ابتلعت ريقها، لم ترد…وحاولت أن تستعطفه:

“أنا عايزة منَّك تساندني بس، إلياس… مش عايزة الخوف يسيطر عليَّا.”

مطَّ شفتيهِ باعتراض، وهزَّ رأسه، ثمَّ أردفَ بصوتٍ منخفضٍ لكنَّه لا يقبلُ الجدال:

“مش هقدر أوعدك، لأن لو في حاجة هتضرِّك…مستحيل أوافق عليها.”

نظرت إليهِ طويلًا، ثمَّ همست بابتسامةٍ ساخرة:

“شفت؟ إنتَ قلتها بنفسك.”

أمسكَ بيدها، وسحبها نحوهِ بلطف، ثم طبعَ قبلةً على كفِّها وهو يهمس:

“قلت إيه؟ قلت إنِّي مش مستعدِّ أضحي بيكي…صح ولَّا إيه؟”

شعرت بالهواءِ يثقلُ في صدرها، كأنَّها على وشكِ الانهيار، اقتربت منهُ بجسدها ودفنت رأسها بصدره، أغمضت عينيها وتنهيدةٌ طويلةٌ خرجت منها كأنها تفرغُ كلَّ ما بداخلها دون كلمات:

“نفسي أرتاح من كلِّ حاجة ياإلياس… نفسي راجح ياخد جزاؤه على اللي عمله فينا، خايفة يخطفك من حضني أوي، عندي إحساس كبير إنِّ سعادتي مش هتدوم معرفشِ ليه”

أخرجها من أحضانهِ وبعيونٍ مكتظَّةٍ بالغضبِ استرسلَ بتساؤل:

“يعني بتعملي ده كلُّه علشان توقَّعي راجح…مش كده؟”

رسمت ابتسامةً ساخرة، مالت برأسها قليلًا وهي تجيبهُ بنبرةٍ خبيثة:

“زي ماإنتَ يا حضرةِ الظابط بتحاول توقَّع راجح ورانيا، علشان متأكِّد أنهم مش هيسكتوا، وجاي توقَّعني في الكلام.”

رغم توتُّرهِ الداخلي، لم يستطع منعَ نفسهِ من الضحك..هزَّ رأسه، وتأمَّلها لوهلةٍ ثم قال وهو يميلُ نحوها:

“بتعملي ذكية عليَّا ياحضرةِ الأستاذة… نسيتي إنِّك قدَّام إلياس السيوفي؟”