شظايا قلوب محترقه من اافصل 37 الى 40 | Romantic Story Chapter

تراجعَ معتذرًا يطبقُ على جفنيهِ ينهرُ حاله، اقتربت منه وعيناها تتفحَّصُ هيئته:
-إلياس إنتَ كويس؟..
هزَّ رأسهِ دون حديثٍ واستدارَ للمغادرة إلَّا أنها أمسكت كفِّهِ تحتضنُ ذراعه:
-مش عايز تقولِّي مالك؟..هوَّ أنا مش مراتك ولَّا شايف مش من حقِّي أعرف جوزي فيه إيه..

احتضنَ وجهها وطبعَ قبلةَ اعتذارٍ فوق جبينها ثمَّ أردف:
-ميرال أنا كويس، قلقان بس على ماما وأرسلان، ياله علشان نروَّح..
-إنتَ هتروح معايا؟..أومأ وتحرَّك للخارجِ قائلًا:
-هوصَّلك وأعدِّي ساعة على المكتب كدا، كنت طلبت من شريف يدوَّر على حاجة توصَّلنا بأرسلان..

بفيلا راجح..
بعد إعلانِ خبر وفاةِ رانيا، ومساعدةِ أعوانهِ ببيانِ الجثة، ذهبَ إلى زيارةِ ابنه، جلس بمقابلته:
-عامل إيه ياطارق؟..
-حضرتك شايف إيه، قولت لي كام أسبوع وهخرَّجك، دخلت في سنة وزي ماأنا، ليه حضرتك ساكت؟!.
-خلاص النقض اتقبل وإن شاءالله هتخرج في الجلسة الجاية، أنا محتاجك معايا، حمحمَ ثم أردف:
-رانيا ماتت..
-إيه!..نطقَ بها مفزوعًا ثمَّ تساءلَ:
-إزاي يعني ماما ماتت!..وليه محدش قالِّي؟..
-اقعد يابنِ راجح وبطَّل تنطيط، ماتت من قرفها لأنَّها ستِّ طماعة وواطية، ومالهاش غالي..
-يعني إيه يابابا؟!
-يعني رانيا مش أمَّك ياروح أبوك، علشان تزعل عليها، افتكر انها السبب في رميتك هنا لولا خططها الهابطة مكنشِ زمانك مسجون..
جزَّ على أسنانهِ يضربُ فوق المنضدة الموضوعة أمامه:
-أنا هنا بسبب ابنِ السيوفي والبنتِ اللي اسمها ميرال، قسمًا عظمًا لأموِّتهم لمَّا أخرج.
-طارق ..صاحَ بها غاضبًا ثمَّ اقترب بجسدهِ مستندًا على الطاولة:
-إحنا ورانا شغل، لا فاضيين لابنِ السيوفي ولا غيره، أبوك دلوقتي بقى المسؤول الأوَّل في مصر، وقريبًا هيكون في الشرق الأوسط، دلوقتي لازم نفكَّر إزاي نرجَّع حقِّنا من بنتِ العامري والصعلوك جوزها، عايزك تتكتك في الكام يوم دول إزاي أرجَّع مالي اللي اتسرق، اللي حضرتك كنت السبب فيه بعد ما كتبته لبنتِ الشحَّاتين..

نار تحرقُ كرامتهِ كلَّما تذكَّر ماصار له، وصراعُ الشياطينِ يضربُ داخل عقلهِ المريض وهو يهمسُ بهسيسٍ مرعب:
-كلِّ واحد هياخد حقُّه من اللي عملوه فيَّا يابابا، وأوَّلهم بنتك الحلوة..
قطعَ حديثهم الشرطي:
-الزيارة انتهت..نهضَ راجح من مكانهِ بعدما سحبهُ الشرطي وهو يقول:
-فكَّر في اللي قولته، وإن شاءالله خلال شهر واحد هتخرج من هنا.