احببتك ولكن بقلم سهام صادق
رنا: طيب ياختي، بكره تندمي… بت معقدة فعلًا.
ذهبوا لأحد المطاعم المتخصصة بالبيتزا، كما طلبت هنا.
حسام وهو ينظر لها: بيتزا ولا غيرتي رأيك؟
هنا بطفولة: طبعًا بيتزا… يلا بقى أنا جعانة جدًا يا حسام.
حسام بابتسامة: حاضر… لأحسن تاكليني…
ثم تذكر يوم ما كانوا في العين السخنة، وكانت تمزح معه بنفس الطريقة.
حسام لنفسه: يا رب تفضلي كده… متعرفيش أنا قد إيه بفرح لما بحس بقربك…
هنا: هو إنت هتسافر شهر ليه؟
حسام: شوية شغل… ولازم أروح بنفسي أخلصهم.
هنا: شهر؟
حسام بابتسامة عذبة: إيه؟ هوحشك؟
هنا بمشاكسة حتى تداري توترها : لا، بس عشان نغيب براحتنا بقى، ومحدش يقولنا هاتوا ملف، راجعوا صفقة، اعملوا كذا… شوفوا الأخطاء…
ثم ابتسمت.
حسام: مممممممم ماشي يا ستي، هريحكم مني… بس مافيش غياب برضوه.
هنا بطفولة: لااا، هنغيب ونفلسع كمان من الشركة بدري.
حسام بضحك: بتعامل مع طفلة يا ربي.
هنا برقة: إذا كان عاجبك.
حسام (وهو يتظاهر بالخوف): عاجبني يا ستي… ويلا كلي بقى، مش عمالة تزني عايزة بيتزا، عايزة بيتزا…
هنا بضحكة خفيفة: ماشي هاكل آه… وهاتلي عصير مانجا بقى.
حسام بابتسامة: حاضر…
انقضى اليوم سريعًا، وكان في غاية الروعة بالنسبة لهم، وبالأخص على حسام… واستبشر من هذا خيرًا، وقرر أن يفتح الطلب اليوم مرة أخرى مع عمه محمود، قبل أن يسافر.
ولكن قرر قبل أن يفتحه مع عمه محمود أن يسألها أولًا.
أوصلها حسام إلى الفيلا ، وقبل أن تفتح باب السيارة…
حسام: هنا… مش عايزة حاجة أجيبهالك من فرنسا؟
هنا بعد تفكير : هاتلي شوكولاتة.
حسام بضحك: يا سلام… فرنسا وعايزة شوكولاتة؟ طيب ده طلب سهل أوي، ما أجيبهالك من هنا.
هنا بمشاكسة ومرح : مش عارفة… هي مش فرنسا مشهورة بالشوكولاتة برضوه؟ يعني عما أظن.
حسام بضحك على طريقتها: عما أظن… طيب يا ستي، مش عايزة حاجة تانية؟
هنا بابتسامة: تروح وترجع بالسلامة.
تنهد حسام وقال بعد أن رأي بصيص الأمل : هنا… هو أنا ممكن أفتح طلبي تاني مع عمي محمود؟
هنا (وهي كانت لا تود أن تقول له ذلك، ولكن هيهات، فعنادها ما زال مسيطرًا عليها): خلينا أصدقاء يا حسام، كده أحسن لينا.
حسام بحزن ثم ابتسم لها: اللي يريحك… وبرضوه هسيبك لغاية لما تقرري وتحبيني…
ثم أضاف: أتمنى تحبيني بدل الكره اللي بقى طاغي عليكي كده، ولا إنتِ بتعاندي؟… نفسي أعرف السبب.
