احببتك ولكن بقلم سهام صادق
**محمود:** إيه يا ست هنا؟ كل ده بتدلعي عليا ولا إيه؟
اعتدلت هنا على فراشها، وقالت:
**هنا:** أبدًا يا بابا، أنا كنت نزلالك حالًا.
ابتسم محمود وقال:
**محمود:** خلاص يا ستي… أنا طلعتلك أهو عشان أقولك إن عمك عبدالله وحسام جايين بكره. حضري نفسك بقى يا عروسة.
وما إن سمعت هنا الخبر، حتى أنفلتت من عينيها دموع حاولت طويلًا أن تخفيها عن الجميع.
تمتمت بصوت مرتجف:
**هنا:** بكره؟
لم ينتبه محمود إلى حقيقة دموعها، وقال بسعادة أبوية:
**محمود:** ومالك مستغربة كده ليه يا حبيبتي؟ أيوه بكره.
ثم نظر إليها بعينين دامعتين، واقترب منها بحنان:
**محمود:** كبرتي يا حبيبتي… وهشوفك عروسة.
ثم قبل جبينها، وتركها وحدها، بينما ظلت هنا جالسة على الفراش وشاردة في ذاكرتها.
**فلاش باك**
**رنا:** إنتِ فين كل ده؟ تأخير يا بنتي، ومن أول يوم في بداية الدراسة!
**هنا عبر الهاتف:** حالًا يا رنا، هكون عندك… بطلي رغي بقى عشان أعرف أسوق.
وبعد دقائق، وصلت هنا إلى صديقتها.
**رنا:** حمدالله على السلامة ياختي… لو مكنّاش أول يوم، كنتي هتعملي إيه؟
ابتسمت هنا بدعابة:
**هنا:** هعمل خط وأمشي عليه.
**رنا:** ظريفة يا بت! يلا أنجري قدامي. صح، مش النهارده هييجي مستثمر هيحكي عن خبرته في السوق ومجال العمل؟
تنهدت هنا بضيق مصطنع:
**هنا:** ييييييييييه! هي ناقصة رغي من أول يوم؟ يا عم إحنا مالنا بالكلام ده؟
ضحكت رنا وقالت:
**رنا:** أومال لو مكنتيش في كلية إدارة أعمال؟ يعني البيزنس والاستثمار كنتي هتقولي إيه؟
قالت هنا بمرح:
**هنا:** كنت هقول جزر.
ضحكت رنا، ثم قالت:
**رنا:** الظاهر إنك بقيتي ظريفة على الآخر ومش حاسة.
ابتسمت هنا بحب:
**هنا:** بضحك معاكي يا رنونتي. يلا بينا يا كبير على محاضرة تثقيف الذات والاعتماد على النفس لكي تصبح رجل أعمال ناجح.
ضحكت رنا على طريقة صديقتها:
**رنا:** رجل أعمال؟ ما شاء الله! ليه؟ شيفانا بشنبات ياختي؟
ضحكت هنا وقالت:
**هنا:** آه صح! إيه رجل أعمال دي؟ سيدات أعمال.
ثم جذبتها من يدها:
**هنا:** يلا بقى يا سيدة الأعمال المرموقة، رنا هانم، على المدرج.
ذهبت الفتاتان معًا، فقد كان هذا هو أول يوم في العام الدراسي.
بعد وقت قليل، قالت رنا بضيق وهي تنظر حولها:
**رنا:** شوفتي رغيك ولكعتك؟ أخرتينا أهو ومش هنلاقي مكان.
