شظايا قلوب محترقه من اافصل السادس عشر الى التاسع عشر | Romantic Story Chapter
بعد فترةٍ غطَّت بنومٍ عميقٍ وكأنَّها لم تنم منذ شهور، نهضَ بهدوء، يجذبُ هاتفه، ثمَّ اتَّجهَ للخارج:
-أيوة ياعمُّو، عامل إيه، أنا وصلت الحمدُ لله، وبعتِّلك الداتا، يبقى احفظ كلِّ اللي عليها..
أجابهُ على الجانبِ الآخر:
-مال صوتك حبيبي..أرجعَ خصلاتهِ للخلفِ وزفرةً قويةً أخرجها من أعماقهِ الحزينةِ قائلًا:
-مفيش، لمَّا تشوف اللي على الداتا هتفهم، المهمّ لازم نكون مصحصحين الفترة الجاية، ياريت يبقى فيه علم بكلِّ كبيرة وصغيرة بتدخل البلد، متنساش الدولة مش مستقرِّة، وكلِّ من هبَّ ودبَّ عايز يثبت نفسه للشعب..
-عُلم ياحضرةِ الظابط، اسمعني فيه خبر لازم تعرفه..
استمعَ إليه باهتمامٍ إلى أن تحدَّثَ إسحاق:
-أنا استقلت من الشرطة، خلاص مبقاش ينفع شغلي هناك، أكيد فاهم قصدي..
-تمام..أنا هنام دلوقتي وبالليل هخرج أتعشَّى برَّة مع مراتي، بلاش شغل حراسة الجيش دا، انا بتخنق.. قاطعه اسحاق:
-لازم أطمِّن عليك، ومش عايز دوشة، ياله روح ارتاح ونتكلِّم بكرة، سهرة سعيدة، سلِّملي على غرام..
عند يزن:
وضعت إيمان الطعامَ على الطاولة، ثمَّ اتَّجهت إلى أخيها، طرقت البابَ ودلفت للداخل:
-حبيبي العشا جاهز، قوم علشان نتعشى، هروح أصحي راحيل..
اعتدلَ يمسحُ على وجهه، ثمَّ جذبَ ساعتهِ ينظرُ بها:
-لسة بدري على العشا، ليه بدري كدا؟..
استدارت قائلة:
-راحيل مااتغدِتش، معرفشِ أكلنا مش عاجبها ولَّا إيه، خليت معاذ يجيب شوية فواكه من عمُّو غالي وشوية جبن منزوعة الدسم، شكلها مابتكلشِ الزيوت دي..
نهضَ من مكانهِ متَّجهًا إلى حمامه:
-يبقى شوفيها بتحبِّ إيه وعرَّفيني أجيبه لها..
-لا بجد!! قالتها باعتراضٍ ثمَّ اقتربت منه:
-دي مراتك يايزن، يعني إنتَ أولى إنَّك تسألها ليه تدخَّلني في حواراتكم..
رمقها بنظرةٍ ثابتة، ثمَّ التوى ثغرهِ بابتسامةٍ عابثة:
-لا والله، على أساس إنِّك مش عارفة طبيعة جوازنا، عيب يامنمن، هزعل منِّك وأستغباكي..
نفخت بضجرٍ واستدارت مغادرةً الغرفة، تهمهمُ بكلماتٍ غيرُ مفهومة، خرجت متَّجهةً إلى غرفتها التي تشاركها مع راحيل، بسطت كفَّها لتفتحها، ولكن قابلتها راحيل على بابِ الغرفة:
-كنت لسة داخلة أصحِّيكي..ابتسمت لها تضعُ كفَّها على بطنها:
-أنا فعلًا كنت جعانة أوي، كنت هسألك طابخة إيه بس مكسوفة..
قهقهت إيمان تجذبها من يديها واتَّجهت إلى المائدةِ تشيرُ على أنواعِ الطعام..
-بصِّي ياستي، دا رز معمَّر بالسمنِ البلدي، واللي جنبه دي بطاية، ودي سلطة، ودي طحينة، ودا لسان عصفور..
