شظايا قلوب محترقه من اافصل السادس عشر الى التاسع عشر | Romantic Story Chapter
قهقهت تجلسُ مرَّةً أخرى:
-أنا شيفاه مش راجل أصلًا..اختتمت جملتها تشيرُ إلى الحرسِ الذي توقَّفَ على البابِ وأشارت إليه:
-خد الزبالة دي إرميها برَّة، البيت دا نضيف، أنا بس حبيت أوصَّلها هيَّ وجوزها رسالة، توقَّفت تقتربُ من رانيا المصدومة:
-أنا عندي أربع رجَّالة يارانيا يدفنوا جوزك في المجاري، إنتِ عندك مين، ابنِ سمية، هه أخرجتها مستهزئة، وتحرَّكت بعض الخطواتِ لتوقفها رانيا:
-هندِّمك على كلِّ كلمة يافريدة، ورحمة جمال اللي بكَّاني بدل الدموع دم لأجيبك ذليلة ليَّا..
التفتت فريدة ونظرت إليها باستخفاف
-اتكلمي على قدك يامدام رانيا، انت وجوزك اللي خافوا على نفسكم مني ومن ولادي
عند إلياس:
توقَّفَ بجوارها، تشبَّثت بكفِّهِ والطبيبةُ تضعُ السائلَ على بطنها وهي تنظرُ إلى الشاشةِ بتمعُّن، لحظاتٍ واستمعوا إلى نبضِ الجنين، التمعت عيناهُ بخطٍّ من الدموع، حاولَ السيطرةَ على نفسهِ والطبيبةُ تشيرُ إلى الجنينِ الذي لم يكتمل أعضائه بعد، ابتسمت الطبيبةُ تطالعها:
-زي ماقولت لك قبلِ كدا ياميرال، البيبي ولد، المرَّة دي واضح أوي، استدارت تنظرُ إلى إلياس وأشارت إلى بعضِ أعضائه، كدا باقي عشر أيام وندخل الخامس أهو، فيه أجزاء مكملتش طبعًا، علشان كدا مش واضح، بس المفروض المدام تهتمّ شوية بأكلها، علشان الوضع يكون أحسن.
-تمام ..قالها وهو يساعدها بالاعتدال، بعد رفضهِ للممرضةِ أن تقتربَ منها، جلست لبعضِ الدقائقِ للحديثِ عن الضرورياتِ الموجبِ فعلها أثناءَ فترةِ حملها..
خلَّلَ أناملهِ بأناملها وتحرَّكَ بجوارِها متَّجهًا إلى السيارة، توقَّفت تطالعه:
-رايحين فين..أشارَ إليها بالركوبِ مجيبًا:
-هوصَّلك على الشغل، وأنا عندي شُغل مهمّ هخلَّصه ونتقابل بالليل عند بابا، فيه موضوع مهمّ لازم نتكلِّم فيه..
أومأت له مقتربةً منه، تعانقُ ذراعه:
-هترجع البيت النهاردة، حاوطَ كتفها ينظرُ لعينيها:
-ميرال هتكمِّلي معايا مش عايز أسئلة في أيِّ حاجة، كلِّ اللي عايزه إنِّك تثقي فيَّا وبس، وقبلِ أيِّ حاجة،
مش هرحم راجح لو انتِ عايزة تروحي لعنده هوصلِّك وأنا عند وعدي..
-هتقدر تعيش من غيري ياإلياس..سؤال خرج من بين شفتيها تتمنى أن يبرد قلبها، استدارَ إلى بابِ السيارةِ ينظرُ إليها من تحتِ نظراته:
-ماأنا كنت عايش من غيرك ياميرال ماممتِّشِ ولا حاجة ..
